वाघोली, ता. 14 : वाघोली (ता. हवेली) परिसरातील बांधकामाच्या ठिकाणी स्टीलचा माल घेऊन आलेल्या ट्रकचालकाला ‘मी या भागाचा मोठा भाई आहे’ अशी धमकी देत खंडणी उकळल्याचा धक्कादायक प्रकार समोर आला आहे. माल खाली करण्यासाठी प्रत्येक गाडीमागे पैसे द्यावे लागतील, अशी धमकी देत आरोपीने यापूर्वी दोन वेळा प्रत्येकी पाच हजार रुपये घेतले. त्यानंतर 10 सप्टेंबर रोजी पैसे देण्यास नकार दिल्याने ट्रकचालकाच्या गालावर चापट मारून त्याच्याकडील 10 हजार 500 रुपये जबरदस्तीने हिसकावून घेतले आहेत.
याप्रकरणी विठ्ठल शेषराव गर्जे (वय 31, रा. आष्टी, जि. बीड) यांनी वाघोली पोलिस ठाण्यात तक्रार दिली आहे. त्यानुसार नवनाथ रिकामे (रा. आव्हाळवाडी, पुणे) याच्याविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, गर्जे हे सन 2020 पासून खराडी येथील नाथकृपा रोडलाईन्स अँड स्टील सप्लायर्स या कंपनीत चालक म्हणून काम करतात. कंपनीच्या आदेशानुसार ते पुणे शहर व परिसरातील विविध बांधकाम प्रकल्पांवर स्टीलचा माल पोहोचवतात. सध्या ते एमएच 12 टीव्ही 9933 क्रमांकाच्या ट्रेलरवर चालक म्हणून कार्यरत आहेत.
गेरा आयओजे, वाघोली येथील बांधकामाच्या ठिकाणी स्टीलचा माल खाली करण्यासाठी गर्जे ऑगस्ट महिन्यात गेले होते. त्यावेळी नवनाथ रिकामे याने स्वतःला त्या भागातील रहिवासी आणि ‘भाई’ असल्याचे सांगत, गँगस्टर लोकांशी ओळख असल्याची बतावणी केली. प्रत्येक गाडीमागे पाच हजार रुपये द्यावे लागतील, पैसे न दिल्यास माल खाली करू देणार नाही आणि येथून जाऊ देणार नाही, अशी धमकी दिली. घाबरलेल्या गर्जे यांनी त्यावेळी पाच हजार रुपये दिले. यानंतर ऑगस्ट महिन्यातच दुसऱ्या ट्रिपवेळीही रिकामे याने अशाच प्रकारे धमकावून आणखी पाच हजार रुपये घेतले. वारंवार याच ठिकाणी माल घेऊन यावे लागणार असल्याने भविष्यात त्रास होऊ नये, या भीतीने गर्जे यांनी याबाबत कोणाला काही सांगितले नाही.
दरम्यान, गर्जे हे 67 टन स्टील घेऊन गेरा आयओजे येथील बांधकामाच्या ठिकाणी 9 सप्टेंबर रोजी गेले. जागा उपलब्ध नसल्याने त्यांनी ट्रेलर तेथेच पार्क केला. दुसऱ्या दिवशी सकाळी साडेआठच्या सुमारास माल खाली करण्यासाठी गाडी लावत असताना नवनाथ रिकामे पुन्हा तेथे आला. त्याने नेहमीप्रमाणे पाच हजार रुपयांची मागणी केली. गर्जे यांनी पैसे देण्यास नकार दिल्याने रिकामे याने दमदाटी सुरू केली.
‘मी या ठिकाणचा मोठा भाई आहे. पैसे दिले नाही तर गाडी खाली करू देणार नाही आणि तुला येथून जाऊ देणार नाही,’ अशी धमकी देत त्याने गर्जे यांच्या गालावर चापट मारली. त्यानंतर मारण्याची धमकी देत त्यांच्याकडील 10 हजार 500 रुपये जबरदस्तीने घेतले आणि पांढऱ्या रंगाच्या ॲक्टिव्हावरून तेथून निघून गेला. या प्रकारामुळे घाबरलेल्या गर्जे यांनी त्याच दिवशी रात्री कंपनीत परतल्यानंतर मालक बबन सांगळे यांना घटनेची माहिती दिली. त्यानंतर सांगळे यांच्यासोबत वाघोली पोलिस ठाण्यात येऊन तक्रार दाखल केली. या प्रकरणाचा पुढील तपास वाघोली पोलिस करीत आहेत.
