पुणे: पुण्यात म्हाडाच्या घरासाठी अर्ज करू इच्छिणाऱ्या नागरिकांना मोठा दिलासा मिळाला आहे. पुणे गृहनिर्माण व क्षेत्रविकास मंडळाने (म्हाडा) 15 टक्के सामाजिक आणि 20 टक्के सर्वसमावेशक गृहनिर्माण योजनांसाठी ऑनलाइन अर्ज करण्याची अंतिम तारीख वाढवली आहे. आता इच्छुकांना 22 ऑक्टोबरच्या रात्री 12 वाजेपर्यंत अर्ज करता येणार आहे. या निर्णयामुळे अंतिम सोडतीची तारीखही पुढे ढकलण्यात आली असून, ती आता 4 डिसेंबर रोजी होणार आहे.
कागदपत्रांची ऑनलाइन पडताळणी वेळेत पूर्ण होत नसल्याने अनेक अर्जदारांना अडचणींचा सामना करावा लागत होता. अधिवास प्रमाणपत्र आणि उत्पन्नाच्या दाखल्याची तपासणी महाआयटीकडून केली जाते. या प्रक्रियेला विलंब होत असल्याने अर्जदारांकडून मुदत वाढवण्याची मागणी केली जात होती. नागरिकांच्या अडचणी लक्षात घेऊन म्हाडाने अर्ज भरण्यासाठी अतिरिक्त वेळ दिला आहे.
या योजनेची जाहिरात म्हाडाने 24 ऑगस्ट रोजी प्रसिद्ध केली होती. सुमारे 4,500 घरांसाठी आतापर्यंत 1,65,028 नागरिकांनी नोंदणी केली आहे. त्यापैकी 1,01,811 अर्जदारांनी अनामत रक्कम भरली आहे. त्यामुळे घरांसाठी नागरिकांचा मोठा प्रतिसाद मिळत असल्याचे आकडेवारीवरून स्पष्ट होते.
मात्र, केवळ नोंदणी करून प्रक्रिया पूर्ण होत नाही. अर्जदारांनी आवश्यक कागदपत्रांची पडताळणी आणि अनामत रक्कम भरण्याची प्रक्रिया वेळेत पूर्ण करणे गरजेचे आहे. म्हाडाचे मुख्याधिकारी राहुल साकोरे यांनी अंतिम मुदतीपूर्वी अनामत रक्कम भरणे बंधनकारक असल्याचे स्पष्ट केले आहे.
त्यामुळे ज्या नागरिकांनी अद्याप अर्ज भरलेला नाही किंवा अनामत रक्कम जमा केलेली नाही, त्यांनी 22 ऑक्टोबरपूर्वी प्रक्रिया पूर्ण करावी. मुदतवाढ मिळाल्याने अर्जदारांना कागदपत्रे पूर्ण करण्यासाठी आणखी वेळ मिळाला आहे. अंतिम सोडत आता 4 डिसेंबरला होणार असल्याने अर्जदारांचे लक्ष या तारखेकडे लागले आहे.
