लोणी काळभोर, ता. 21 : आईच्या उपचारासाठी उसने घेतलेल्या पैशांच्या बदल्यात दिलेली 5 लाख रुपये किमतीची ‘मारुती स्विफ्ट’ कार मित्राने आणि त्याच्या ओळखीच्या व्यक्तीने संगनमत करून हडपल्याचा धक्कादायक प्रकार फुरसुंगी येथे उघडकीस आला आहे. या प्रकरणी थेऊर येथील एका तरुणावर फुरसुंगी पोलीस ठाण्यात गुन्हा दाखल करण्यात आला आहे.
नरेंद्र विनायक दाभाडे (वय-33, रा. ग्रीन पार्क, फुरसुंगी) असे फसवणूक झालेल्या तरुणाचे नाव आहे. तर हर्षल कुमावत, रा. थेऊर, ता. हवेली असे गुन्हा दाखल करण्यात आलेल्या तरुणाचे नाव आहे. याप्रकरणी नरेंद्र दाभाडे यांनी फुरसुंगी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी नरेंद्र दाभाडे हे एका नामांकित लॉजिस्टिक कंपनीत ‘सीनिअर स्पेशालिस्ट डेव्हलपर’ म्हणून कार्यरत आहेत. 5 मार्च 2026 रोजी त्यांच्या आईची तब्येत अचानक बिघडल्याने त्यांना तातडीने 1 लाख रुपयांची गरज होती. त्यांनी आपला मित्र सौरभ गलांडे याच्याकडे मदत मागितली. सौरभने “माझ्याकडे पैसे नाहीत, पण माझा मित्र हर्षल कुमावत तुला पैसे देऊ शकतो,” असे सांगून त्यांना भेकराईनगर येथील एका बँकेसमोर भेटीसाठी बोलावले.
यावेळी हर्षल कुमावत याने पैसे देण्याची तयारी दर्शवली, मात्र ‘सिक्युरिटी’ म्हणून नरेंद्र यांची मारुती सुझुकी स्विफ्ट कार (MH 09 GM 6657) आणि आरसी बुक स्वतःकडे ठेवण्याची अट घातली. आईच्या उपचारासाठी पैशांची अत्यंत गरज असल्याने नरेंद्र यांनी आपली 5 लाख रुपये किमतीची लाल रंगाची कार हर्षलच्या ताब्यात दिली. हर्षलने सायंकाळपर्यंत 1 लाख रुपये ऑनलाईन पाठवतो, असे आश्वासन दिले होते.
त्याच दिवशी दुपारी नरेंद्र यांची इतर नातेवाईकांकडून पैशांची सोय झाली. त्यामुळे त्यांनी तात्काळ सौरभला फोन करून “आता मला हर्षलच्या पैशांची गरज नाही, माझी गाडी परत मागवून घे,” असे सांगितले. हर्षलने फोनवर “दुपारी 4 वाजेपर्यंत गाडी आणून देतो,” असे सांगितले, पण त्यानंतर त्याने टाळाटाळ सुरू केली. उद्या देतो अशी खोटी आश्वासने देऊन त्याने 13 दिवस उलटले तरी गाडी परत केली नाही.
दरम्यान, आपली गाडी परत मिळत नाही आणि हर्षल कुमावत केवळ तारखा देत आहे, हे लक्षात आल्यावर नरेंद्र दाभाडे यांनी आपली फसवणूक झाल्याचे ओळखून फुरसुंगी पोलीस ठाण्यात धाव घेतली. पोलिसांनी 5 लाख रुपये किमतीची कार आणि आरसी बुक हडपल्याप्रकरणी हर्षल कुमावत याच्या विरुद्ध गुन्हा दाखल केला आहे. तपास पोलीस हवालदार हरिदास कदम करीत आहेत.
