Baramati Nagarparishad Election: जिल्ह्यातील बारामती नगरपरिषद निवडणुकीमध्ये अखेर राष्ट्रवादी कॉंग्रेस अजित पवार (NCP Ajit Pawar) गटाकडून नगराध्यक्ष पदासाठी आपला उमेदवार जाहीर करण्यात आला आहे. अजित पवारांचे विश्वासू सचिन सातव (Sachin Satav) यांची नगराध्यक्ष पदासाठी पक्षाकडून अधिकृत उमेदवारी जाहीर करण्यात आली आहे.
सचिन सातव यांच्या नावाची अधिकृत घोषणा
बारामतीच्या नगराध्यक्ष पदाबाबत राष्ट्रवादी अजित पवार गटाकडून बऱ्याच दिवसांपासून चर्चा रंगत होती. त्यात त्यांचे पुत्र जय पवारांचेही नाव समोर येत होते. अनेक अंदाज लावण्यात येत होते. मात्र आता तर्कवितर्कांना पूर्णविराम देण्यात आला आहे. अध्यक्ष पदासाठी सचिन सातव यांच्या नावाची अधिकृत घोषणा पक्षाकडून करण्यात आली आहे.
दरम्यान आगामी नगरपरिषद निवडणुकीचा विचार करता बारामतीमध्ये राष्ट्रवादी अजित पवार, भाजप आणि राष्ट्रवादी शरद पवार गट अशी तिहेरी लढत चुरशीची होणार आहे. राज्यात सत्तेत एकत्र असूनही बारामतीत मात्र राष्ट्रवादी (अ प) आणि भाजप एकमेकांविरोधात रणशिंग फुंकणार आहेत. तर शरद पवार गटही आपली ताकद लावणार आहे.
