पुणे : पुण्यातील ग्रामीण भागात सीएनजी वाहनांचा वापर करणाऱ्या नागरिकांना आता इंधनासाठी अधिक पैसे मोजावे लागणार आहेत. सीएनजी पुरवठा करणाऱ्या टॉरेंट गॅस कंपनीने इंधनाच्या दरात प्रति किलो 2 रुपयांची वाढ केली आहे. विशेष म्हणजे, या दरवाढीमुळे पुण्यातील ग्रामीण भागात सीएनजीच्या किमतीने तब्बल 100 रुपयांचा टप्पा ओलांडला आहे.त्यामुळे सर्वसामांन्याच्या खिशाला पुन्हा कात्री लागणार आहे.
नवीन दर 7 ऑक्टोबर रोजी मध्यरात्री 12.01 वाजेपासून संपूर्ण पुणे परिसरात लागू करण्यात आले आहेत. या बदलामुळे आता जुन्या 98.50 रुपये प्रति किलो या दराऐवजी वाहनधारकांना 100.50 रुपये प्रति किलो या दराने सीएनजी खरेदी करावा लागणार आहे. पेट्रोल डीलर्स असोसिएशन पुणेचे अध्यक्ष ध्रुव रुपारेल यांनी या नवीन दरवाढीसंदर्भातील माहिती दिली आहे.
सीएनजीच्या दरातील महत्त्वाचे बदल:
जुना दर: 98.50 रुपये प्रति किलो
नवीन दर: 100.50 रुपये प्रति किलो
एकूण वाढ: 2.00 रुपये प्रति किलो
सध्या सणासुदीचे दिवस सुरू असल्याने प्रवासाचे प्रमाण वाढले आहे. अशा वेळी ऐन सणांच्या काळातच इंधनाचे भाव वाढल्याने सर्वसामान्यांचे आर्थिक नियोजन कोलमडण्याची शक्यता आहे. दररोज कामानिमित्त प्रवास करणारे नागरिक, ऑटोरिक्षा चालक, टॅक्सी चालक तसेच व्यावसायिक आणि खाजगी सीएनजी कार मालकांना या निर्णयाचा मोठा फटका बसणार आहे.
अचानक झालेल्या या भाववाढीमुळे इंधनाचा मासिक खर्च वाढल्याने प्रवाशांसह चालक वर्गातूनही तीव्र नाराजी व्यक्त केली जात आहे.
