बारामती: बारामती आपल्या लाडक्या ‘दादां’ना (Ajit Pawar) अखेरचा निरोप देण्यासाठी अश्रू ढाळत होती. संपूर्ण शहर शोकात बुडाले असतानाच, याच भावूक वातावरणाचा फायदा घेत काही लोकांनी माणुसकीला काळिमा फासणारे कृत्य केले आहे. विद्या प्रतिष्ठानच्या मैदानावर अजित पवार यांच्या अंत्यदर्शनासाठी जमलेल्या गर्दीत चोरट्यांनी अक्षरशः धुमाकूळ घालत 25 लाख रुपये किमतीचे सोन्याचे दागिने लंपास केले.
अजित पवारांच्या अंत्यविधीसाठी राज्यभरातून लाखोंचा जनसमुदाय लोटला होता. कडेकोट सुरक्षेसाठी प्रशासनाने 8 हजार पोलिसांचा फौजफाटा तैनात केला होता. मात्र, पोलिसांच्या गराड्याला चकवा देत चोरट्यांनी 15 हून अधिक नागरिकांना लक्ष्य केले.
गळ्यातील सोन्याच्या साखळ्या आणि महागडे दागिने खेचण्यासाठी या टोळीने गर्दीचावापर केला. धक्कादायक म्हणजे, पोलीस ज्या ठिकाणी सर्वाधिक संख्येने उपस्थित होते, त्याच परिसरात हे चोरीचे प्रकार सर्वाधिक घडले. याप्रकरणी 6 जणांना ताब्यात घेण्यात आले आहे. बारामती तालुका पोलिसांनी आतापर्यंत 10 अधिकृत गुन्हे दाखल केले असून अधिक तपास सुरु आहे.
