फलटण: फलटण तालुक्यातील खामगाव येथे एका भीषण अपघातामुळे संपूर्ण शिंदे कुटुंबाचा अंत झाला आहे. बुधवारी पहाटे घडलेल्या या दुर्घटनेने संपूर्ण महाराष्ट्रात शोककळा पसरली असून, एकाच कुटुंबातील ४ जणांचा दुर्दैवी मृत्यू झाला आहे.
ही हृदयद्रावक घटना पहाटे 5:30 ते 6:00 च्या दरम्यान घडली. घराजवळील एका उघड्या विद्युत वाहिनीच्या संपर्कात किसन शिंदे (वय 48) आल्याने त्यांना तीव्र विजेचा धक्का बसला. पतीला वाचवण्यासाठी पत्नी गंगुबाई शिंदे (वय 46) धावल्या, मात्र त्याही विद्युत प्रवाहाच्या विळख्यात आल्या. आई-वडिलांना वाचवण्यासाठी मुलगा सचिन शिंदे (वय 26) आणि मुलगी आरती शिंदे (वय 22) यांनी धाव घेतली, परंतु विजेचा प्रवाह इतका तीव्र होता की, चौघेही एकमेकांना वाचवण्याच्या प्रयत्नात वायरला चिकटले आणि त्यांचा जागीच मृत्यू झाला.
एका क्षणात हसत्या-खेळत्या कुटुंबाचा असा अंत झाल्याने परिसरात मोठी खळबळ उडाली आहे. पोलिसांनी पंचनामा केला आहे. या घटनेमुळे फलटण तालुक्यावर दुःखाचे सावट पसरले असून, परिसरात सर्वत्र हळहळ व्यक्त केली जात आहे.
