छत्तीसगड: छत्तीसगडमधील भिलई येथील स्मृती नगर परिसरात एका हॉटेलमध्ये १९ वर्षीय तरुणाच्या संशयास्पद मृत्यूने मोठी खळबळ उडाली आहे. शादाब शेख नावाचा हा तरुण एक संगीत कलाकार होता. मंगळवारी संध्याकाळी ६ वाजता तो आपल्या मैत्रिणीसोबत हॉटेलमध्ये गेला होता. तिथे दोघांनी मद्यपान केले आणि त्यानंतर काही तासांतच शादाबचा दुर्दैवी अंत झाला. ही घटना आता पोलिसांसाठी आणि मृताच्या नातेवाईकांसाठी एक मोठे गूढ बनली आहे.
मैत्रिणीचा असा दावा आहे की, रात्री मद्यधुंद अवस्थेत असताना शादाबने स्वतः गळफास लावून आत्महत्या केली. सकाळी तिला तो लटकलेल्या अवस्थेत सापडला, त्यानंतर तिने त्याला खाली उतरवून रुग्णालयात नेले, पण डॉक्टरांनी त्याला मृत घोषित केले. मात्र, ही थिअरी शादाबच्या कुटुंबीयांना अजिबात पटलेली नाही. शादाबच्या भावाने, अल्ताफ शेखने, या घटनेत त्या तरुणीचाच हात असल्याचा गंभीर आरोप केला आहे. शादाबच्या अंगावर बेल्टने मारल्याच्या खुणा आणि ब्लेडने कापल्याच्या जखमा असल्याचे कुटुंबीयांचे म्हणणे आहे.
शादाबचे मित्रही यावर संशय व्यक्त करत आहेत. त्यांच्या मते, गेल्या ६ महिन्यांपासून तो या तरुणीच्या संपर्कात होता. हॉटेलच्या सीसीटीव्ही फुटेजमध्ये एक धक्कादायक गोष्ट समोर आली आहे; रात्री ११:३० वाजता त्याचे मित्र खोलीवर आले होते, तेव्हा दरवाजा उघडला गेला नाही. पहाटे ६ वाजता ती तरुणी बाहेर आली आणि पुन्हा आत गेली. सकाळी ८:३० वाजता जेव्हा दरवाजा उघडला, तेव्हा शादाबचा मृतदेह बेडवर होता आणि पंख्याला स्कार्फ लटकत होता.
शादाब आत्महत्या करूच शकत नाही, असे त्याचे मित्र ठामपणे सांगत आहेत. आता सर्व लक्ष फॉरेन्सिक रिपोर्ट आणि शवविच्छेदन अहवालाकडे लागले आहे. दरम्यान, पोलिस अधिक तपास करत आहेत.
