इंदापूर : तुळजापूर येथून देवीची भवानी ज्योत घेऊन येत असताना इंदापूर तालुक्यातील शेळगाव हद्दीत दोन मंडळांच्या कार्यकर्त्यांमध्ये वाद झाल्याची घटना समोर आली आहे. या वादाचे रूपांतर मारामारी आणि दगडफेकीत झाले. या घटनेत एका जीपची तोडफोड करण्यात आली, तर एका तरुणाच्या गळ्यातील पाच तोळे वजनाची सोनसाखळी हिसकावल्याचा आरोप करण्यात आला आहे. याप्रकरणी वालचंदनगर पोलिसांनी १२ जणांविरुद्ध गुन्हा दाखल केला आहे.
तुषार अशोक नानवरे (वय ३१) आणि त्यांच्या मंडळाचे सदस्य जीपमधून तुळजापूर येथून आणलेली भवानी ज्योत घेऊन शेळगावच्या दिशेने जात होते. यावेळी शेळगाव हद्दीत काही जणांनी त्यांची जीप अडवली. ‘आमच्या मंडळाची ज्योत येत आहे,’ असे सांगत त्यांनी वाद घातला आणि दमदाटी केल्याचे फिर्यादीत नमूद करण्यात आले आहे.
वाद वाढल्यानंतर दोन्ही मंडळांच्या कार्यकर्त्यांमध्ये मारामारी सुरू झाली. यावेळी संबंधितांनी तुषार नानवरे यांच्या जीपवर दगडफेक करून वाहनाचे नुकसान केल्याचा आरोप आहे. नानवरे यांनाही लाथाबुक्क्यांनी आणि दगडाने मारहाण करण्यात आल्याचे तक्रारीत म्हटले आहे.
मारामारी सुरू असताना झटापटीचा फायदा घेऊन एका व्यक्तीने नानवरे यांच्या गळ्यातील पाच तोळे वजनाची सोनसाखळी हिसकावून नेल्याचे फिर्यादीत नमूद करण्यात आले आहे. या घटनेनंतर नानवरे यांनी वालचंदनगर पोलीस ठाण्यात तक्रार दिली.
या तक्रारीच्या आधारे पोलिसांनी शेळगाव येथील ११ जणांसह बारामती तालुक्यातील सूर्यनगरी येथील एका व्यक्तीविरुद्ध गुन्हा दाखल केला आहे. या प्रकरणाचा पुढील तपास वालचंदनगर पोलीस करीत आहेत.
