शिरूर: जागेच्या वादातून एका व्यक्तीचा खून करण्यासाठी सुपारी देण्यात आली; मात्र नियोजित व्यक्तीऐवजी एका निष्पाप कामगाराचा गोळी झाडून खून झाला असल्याच्या गुन्ह्याचा धक्कादायक प्रकार रांजणगाव पोलीस ठाण्याच्या हद्दीत जिल्हा स्थानिक गुन्हे अन्वेषण विभाग आणि रांजणगाव एमआयडीसी पोलिसांनी संयुक्तरित्या केलेल्या कारवाईमध्ये उघडकीस आणला आहे. या गंभीर गुन्ह्याचा छडा लावत रांजणगाव पोलिसांनी पाच आरोपींना अटक केली असून,आणखी दोन आरोपींचा शोध सुरू आहे.
रांजणगाव पोलीस ठाण्यात दाखल असलेल्या गुन्ह्यातील फिर्यादीनुसार, हमजा उस्मान शेख (वय ३७, रा.कारेगाव, साईनगर, ता.शिरूर,जि.पुणे) हे नेहमीप्रमाणे कामावर गेले होते.यावेळी अज्ञात व्यक्तींनी त्यांच्या डोक्यात गोळी झाडून त्यांचा खून केला. या घटनेने परिसरात एकच खळबळ उडाली होती.
घटनेचे गांभीर्य लक्षात घेऊन वरिष्ठ पोलिस अधिकाऱ्यांनी गुन्हा तातडीने उघडकीस आणण्याच्या सूचना दिल्या. त्यानंतर स्थानिक गुन्हे शाखा व रांजणगाव पोलिसांनी संयुक्त तपास सुरू केला. घटनास्थळ तसेच परिसरातील रस्त्यांवरील सीसीटीव्ही फुटेज तपासण्यात आले. त्याचबरोबर तांत्रिक विश्लेषणाच्या आधारे संशयितांचा माग काढण्यात आला.
तपासादरम्यान सार्थक संदेश कोहकडे (वय-२४, रा.कारेगाव, ता.शिरूर,जि.पुणे), तुषार अजय तोडकर (वय-२६, रा.पेठ, ता. आंबेगाव, जि.पुणे), संतोष मधुकर मांजरे (वय-३७, रा.मांजरेवस्ती, ता.खेड,जि.पुणे), विठ्ठल नवनाथ पिकळे (वय-२७, रा.कोरेगाव, ता.खेड,जि.पुणे) आणि योगेश विलास इडोळे (वय-२८,रा. शुक्रवार पेठ वाशिम, ता.जि. वाशिम) या पाच जणांना पोलिसांनी ताब्यात घेतले.
जागेच्या वादातून खुनाची सुपारी
पोलिस तपासात समोर आलेल्या माहितीनुसार, सार्थक कोहकडे याचा विकास नवले याच्यासोबत जागेवरून वाद झाला होता. या वादातून विकास नवले यांचा खून करण्यासाठी कोहकडे याने तुषार तोडकर याला सुपारी दिल्याचे तपासात निष्पन्न झाले. तुषार तोडकर याने पुढे सराईत गुन्हेगार संतोष मांजरे याच्याशी संपर्क साधला. त्यानंतर मांजरे याने आपल्या साथीदारांच्या मदतीने विकास नवले यांच्या खुनाचा कट रचल्याचे पोलिस तपासात समोर आले.
मात्र, खुनासाठी आखलेल्या कटात मोठी चूक झाली आणि प्रत्यक्ष विकास नवले याला समजण्यात झालेल्या गफलतीत कामगार हमजा शेख याचा गोळी झाडून खून करण्यात आल्याचे पोलिस तपासात निष्पन्न झाले आहे. या प्रकरणात पोलिसांनी पाच जणांना अटक केली असून, पवन सुरेश हुंडारे आणि पृथ्वी ऊर्फ भैय्या दत्तू जाधव या दोघांचा शोध सुरू आहे.
सीसीटीव्ही फुटेज, तांत्रिक विश्लेषण आणि पोलिसांच्या कौशल्यपूर्ण तपासामुळे या खुनाच्या कटाचा पर्दाफाश झाला आहे. या प्रकरणाचा पुढील तपास रांजणगाव पोलीस करीत आहेत.
