पुणे: पुण्यात रस्त्यावर गहाळ झालेली लाखो रुपयांची रोकड आणि धनादेश असलेली बॅग पोलिसांनी अवघ्या 48 तासांत शोधून काढली. येवलेवाडी परिसरातील या घटनेत किराणा व्यापाऱ्याची बॅग दुचाकीवरून प्रवास करताना कुठेतरी पडली होती. बॅगमध्ये 2 लाख 54 हजार रुपयांची रोकड आणि सुमारे अडीच लाख रुपयांचा स्वाक्षरी केलेला धनादेश होता.
येवलेवाडीतील ‘बालाजी ट्रेडर्स’चे मालक 16 तारखेला दुकानासाठी आवश्यक असलेला माल खरेदी करण्यासाठी दुचाकीवरून निघाले होते. प्रवासादरम्यान त्यांची बॅग रस्त्यात पडली. काही अंतर गेल्यानंतर बॅग जवळ नसल्याचे त्यांच्या लक्षात आले. त्यानंतर त्यांनी तातडीने कोंढवा बुद्रुक येवलेवाडी पोलिसांकडे धाव घेतली.
व्यापाऱ्याने दिलेल्या माहितीनंतर पोलिसांनी या प्रकरणाचा तपास सुरू केला. वरिष्ठ पोलीस निरीक्षक मारुती पाटील आणि गुन्हे शाखेचे पोलीस निरीक्षक दीपक कारंडे यांच्या मार्गदर्शनाखाली तपास पथकाने व्यापाऱ्याने प्रवास केलेल्या मार्गावरील सीसीटीव्ही फुटेज तपासण्यास सुरुवात केली.
फुटेज तपासत असताना एका सोसायटीजवळ रस्त्यावर पडलेली बॅग एका पायी जाणाऱ्या व्यक्तीने उचलल्याचे पोलिसांच्या निदर्शनास आले. त्यानंतर पोलिसांनी त्या व्यक्तीचा माग काढला. संबंधित व्यक्ती बॅग घेऊन जवळच्या सोसायटीमध्ये गेल्याचे तपासातून समोर आले.
यानंतर पोलिसांनी सोसायटीमध्ये जाऊन संबंधित व्यक्तीकडून बॅग ताब्यात घेतली. बॅगमधील 2 लाख 54 हजार रुपयांची रोकड आणि स्वाक्षरी केलेला धनादेश सुरक्षित असल्याची खात्री केल्यानंतर तो सर्व ऐवज व्यापाऱ्याच्या स्वाधीन करण्यात आला. पोलिसांच्या जलद कारवाईमुळे व्यापाऱ्याला मोठा दिलासा मिळाला.
