जुन्नर, (पुणे) : पुणे जिल्ह्यातील जुन्नर तालुक्यातून एक धक्कादायक घटना समोर आली आहे. चार वर्षाचा मुलगा अंगणात खेळत असतना बिबट्याने त्याच्यावर हल्ला चढवल्याची घटना घडली आहे. या घटनेत चार वर्षांचा मुलगा गंभीर जखमी झाला आहे. आयुष सचिन शिंदे असं जखमी झालेल्या मुलाचं नाव आहे. जुन्नर येथील उंब्रज येथे सोमवारी सायंकाळी साडेसहा वाजण्याच्या सुमारास ही घटना घडली. या घटनेने परिसरात भीतीच वातावरण पसरलं आहे.
मिळालेल्या अधिक माहितीनुसार, आयुष हा आपल्या घराच्या अंगणात खेळत होता. त्यावेळी शेजारील उसाच्या शेतातून बिबट्या बाहेर आला आणि त्याने हल्ला चढवला. आयुषच्या आई-वडिलांनी आरडाओरडा केल्याने बिबट्या जखमी मुलाला सोडून पळून गेला. या बिबट्याच्या हल्ल्यात आयुषच्या मानेला आणि डोक्याला गंभीर जखमा झाल्या आहेत.
त्याच्यावर आळे फाटा येथील खासगी रुग्णालयात उपचार सुरू आहेत. घटनेची माहिती मिळताच वन विभागाच्या अधिकाऱ्यांनी आयुष आणि त्याच्या कुटुंबीयांची रुग्णालयात भेट घेऊन हल्ल्याची माहिती गोळा केली. वनविभागाच्या हलगर्जीपणामुळे ही घटना घडल्याचा दावा आयुष शिंदेच्या कुटुंबांनी केला आहे.
