पुणे : कौटुंबिक कारणांवरून विवाहितेचा शारीरिक (Pune Crime) आणि मानसिक छळ करून (Pune News) तिला घटस्फोट देण्यासाठी दबाव आणल्याचा धक्कादायक प्रकार कोंढवा परिसरात उघडकीस आला आहे. या त्रासाला कंटाळून एका विवाहितेने ओढणीच्या साहाय्याने गळफास घेऊन आत्महत्या केली. पोलिसांनी पती, सासू, दीर आणि नणंद यांच्यावर गुन्हा दाखल केला आहे.
आत्महत्या केलेल्या महिलेचं नाव दिशा निलेश शहा (वय 25) असं आहे. या प्रकरणी तिची आई हीतश्री संदेश शहा (वय 57, रा. सोमजी हाईटस, श्रद्धानगर, कोंढवा) यांनी कोंढवा पोलिस ठाण्यात फिर्याद दिली आहे. त्यावरून पोलिसांनी पती निलेश दिलीप शहा, सासू संगीता शहा, दीर प्रशांत शहा (तिघे रा. भुगाव) आणि नणंद ममता व्होरा (रा. नाशिक) यांच्यावर आत्महत्येस प्रवृत्त केल्याचा गुन्हा दाखल केला आहे.
पोलिसांनी दिलेल्या माहितीनुसार, दिशा हिचा विवाह 20 डिसेंबर 2024 रोजी निलेश शहा (वय 30, रा. माऊंट ब्लेअर सोसायटी, भुगाव) याच्यासोबत जैन समाजातील परंपरेनुसार झाला होता. निलेश शहा खासगी नोकरी करत होता. लग्नानंतर त्याने दिशाला नोकरी सोडायला भाग पाडलं. त्यानंतर तिचा सासरकडून सातत्याने मानसिक आणि शारीरिक छळ सुरू झाला. तिला “तू स्लो आहेस”, “तुला संसार जमत नाही”, “तुझे डोळे छोटे आहेत” अशा शब्दांनी अपमानित केलं जात होतं. दिशा हिला स्वयंपाक करायला लावायचे, मात्र तिचं बनवलेलं अन्न कोणी खात नसे, असंही फिर्यादीने तक्रारीत म्हटलं आहे.
29 सप्टेंबर 2025 रोजी पती निलेश, सासू संगीता आणि नणंद ममता व्होरा हे दिशाला घेऊन तिच्या माहेरी आले. यावेळी ममता हिने फिर्यादींना “दिशाचं लग्न का केलं?” असं म्हटलं. त्यानंतर निलेश म्हणाला की, “तिला संसार जमणार नाही,” असं सांगून तिला माहेरी सोडून गेले. दुसऱ्या दिवशी म्हणजे 28 सप्टेंबर रोजी निलेश आणि संगीता पुन्हा तिचे कपडे घेऊन आले आणि घटस्फोट घेण्याची तयारी असल्याचं सांगितलं. त्यावेळी त्यांनी दिशासोबत वाद घालून तिच्या गळ्यातील दीड तोळ्याचं सोन्याचं मंगळसूत्र आणि कानातील दागिने जबरदस्तीने घेतले.
या घटनेनंतर दिशा मानसिक तणावात होती. 3 ऑक्टोबर रोजी दुपारी सुमारे 1.30 वाजता तिच्या आई हितश्री शहा या एटीएममधून पैसे काढायला गेल्या असताना दिशाने हॉलमधील सिलिंग फॅनला ओढणीने गळफास घेऊन आत्महत्या केली. धार्मिक विधी पूर्ण केल्यानंतर आईने पोलिसांत फिर्याद दिली आहे. या प्रकरणाचा पुढील तपास वरिष्ठ पोलीस निरीक्षक कुमार घाडगे करत आहेत.
