पुणे : एमपीएससीच्या औषध निरीक्षक पदाच्या परीक्षेचा पेपर फुटल्याच्या प्रकरणावरून राज्यातील वातावरण तापले आहे. विद्यार्थ्यांमध्ये नाराजी असून पुण्यात विद्यार्थ्यांनी आंदोलन करत महाराष्ट्र लोकसेवा आयोगाचे अध्यक्ष विवेक भीमनवार यांच्या राजीनाम्याची मागणी केली. याच पार्श्वभूमीवर आमदार रोहित पवार यांनी मोठा दावा केला आहे. विवेक भीमनवार यांच्या जागी धडाकेबाज अधिकारी तुकाराम मुंढे यांची एमपीएससीच्या अध्यक्षपदी नियुक्ती होऊ शकते, असे त्यांनी म्हटले आहे.
पत्रकार परिषदेत बोलताना रोहित पवार यांनी सांगितले की, एमपीएससी अध्यक्षपदासाठी तुकाराम मुंढे पात्र ठरू शकतात. या पदासाठी असलेल्या अटी आणि निकषांचा आपण तपास केला असून, त्यानुसार मुंढे अध्यक्ष होऊ शकतात, असा दावा पवारांनी केला. त्यामुळे भीमनवार यांच्या राजीनाम्याची मागणी करतानाच त्यांच्या जागी तुकाराम मुंढे यांची नियुक्ती करण्याचा पर्यायही त्यांनी सूचित केला.
विवेक भीमनवार यांची कारकीर्द वादग्रस्त असल्याचा आरोपही रोहित पवार यांनी केला. त्यांच्या विरोधात यापूर्वीच तक्रार करण्यात आली असून, संबंधित प्रकरणात मुख्यमंत्री आणि राज्यपालांकडे पुरावे दिल्याचा दावा त्यांनी केला. एमपीएससीमध्ये सुरू असलेल्या कथित गैरप्रकारांविरोधात आपला लढा सुरूच राहणार असल्याचेही पवारांनी सांगितले.
दरम्यान, हे आंदोलन स्वतःचे नसून विद्यार्थ्यांच्या प्रश्नांना पाठिंबा देण्यासाठी आपण सहभागी होत असल्याचे रोहित पवार यांनी स्पष्ट केले. पुढील आंदोलनाबाबत विद्यार्थ्यांशी चर्चा करून निर्णय घेतला जाईल, असेही त्यांनी सांगितले. विद्यार्थ्यांच्या प्रश्नांवर सरकारने गांभीर्याने भूमिका घ्यावी आणि चुकीच्या निर्णयांविरोधात आवाज उठवावा, असे आवाहन त्यांनी केले.
