पुणे: पुण्यातील स्वारगेट बस स्थानकात २६ वर्षीय तरुणीवर झालेल्या अत्याचार प्रकरणानंतर शिवसेना ठाकरे गटाने आक्रमक भूमिका घेत आंदोलन केले होते. बुधवारी पुण्यातील ठाकरे गटाचे नेते वसंत मोरे यांनी आपल्या कार्यकरत्यांसोबत स्वारगेट बस स्थानकाततील सुरक्षा रक्षकांची केबिन फोडली होती. त्यानंतर शिवसेना नेते उद्धव ठाकरे यांनी फोन वरुण वसंत मोरे यांच्या आंदोलनाचं कौतुकही केलं होतं. मात्र त्यानंतर आता पालकमंत्री अजित पवार यांनी वसंत मोरे यांना इशारा दिला आहे.
अजित पवार म्हणाले..
” अगोदर स्वारगेट बलात्कार प्रकरणाचा तपास पूर्ण होऊ द्या. या प्रकरणातील सत्य काय त्याचा उलगडा होऊ द्या. आरोपी सापडत नाही म्हणून तोडफोड करत स्वतःला वेगळं दाखवण्याचा प्रयत्न करताय. कोणी सार्वजनिक मालमत्तेचं नुकसान करत असेल तर त्याच्याकडून वसूल केला पाहिजे, असं कोर्टाने म्हटलं आहे”, असं पालकमंत्री अजित पवारांनी म्हटलं आहे.
या प्रकरणात आता राग व्यक्त करणारांनी मर्यादेत राहून कृती कराव्यात अशी तंबी पालकमंत्री अजित पवारांनी दिली आहे. नाहीतर कायद्याच्या चौकटीत राहून कारवाई केली जाईल, असा इशारा अजित पवार यांनी दिला आहे. पालकमंत्री अजित पवार यांनी नाव न घेता वसंत मोरे यांच्यावर भाष्य केलं आहे.
