पुणे : पुणे शहर आणि परिसरात अचानक सुरू झालेल्या मुसळधार अवकाळी पावसामुळे जनजीवन विस्कळीत झाले आहे. नोव्हेंबरच्या सुरुवातीलाच पावसाने जोरदार हजेरी लावल्याने शहरातील प्रमुख रस्त्यांवर पाणी साचले असून, अनेक भागांत मोठी वाहतूक कोंडी झाली आहे. शुक्रवारी सुरू झालेला पाऊस सोमवारी सकाळीही सुरूच असल्याने नागरिकांना मोठ्या गैरसोयींचा सामना करावा लागत आहे.
पुण्यातील सिंहगड रस्त्यावर अनेक ठिकाणी पावसाचे पाणी साचल्याने वाहनांचा वेग मंदावला आहे. परिणामी, रस्त्यावर वाहनांच्या लांबच लांब रांगा लागल्या आहेत. सकाळच्या वेळेत कामावर जाणाऱ्या नोकरदारांना या वाहतूक कोंडीचा मोठा फटका बसला. दुचाकी आणि चारचाकी वाहनचालकांना बराच वेळ रस्त्यावरच थांबावे लागत आहे.
शहरातील मध्यवर्ती भाग असलेल्या स्वारगेट परिसरातही पावसामुळे वाहतुकीचा वेग मंदावला आहे. चौकाच्या सर्व बाजूंनी वाहनांची गर्दी झाल्याने वाहतूक कोंडी निर्माण झाली. याशिवाय शहरातील अनेक प्रमुख रस्त्यांवर पाणी साचल्याने वाहनचालकांना मार्ग काढताना अडचणी येत आहेत.
रस्त्यांवरील खड्डे आणि साचलेले पाणी यामुळे दुचाकीस्वारांचे हाल अधिकच वाढले आहेत. पाण्याचा अंदाज न आल्याने वाहन चालवताना अपघाताचा धोका निर्माण झाला आहे. अचानक आलेल्या पावसामुळे नागरिकांचीही धावपळ उडाली.
दरम्यान, हवामान विभागाने पुणे आणि परिसरात पुढील दोन ते तीन दिवस पावसाची शक्यता वर्तवली आहे. त्यामुळे नागरिकांनी घराबाहेर पडताना हवामानाचा अंदाज घ्यावा, वाहतूक कोंडी लक्षात घेऊन प्रवासाचे नियोजन करावे आणि वाहन चालवताना खबरदारी घ्यावी, असे आवाहन करण्यात येत आहे.
