पुणे: पुणे जिल्ह्यातील कुरुळी येथे एक धक्कादायक घटना उघडकीस (Pune Crime) आली आहे. प्रेमसंबंधात अडथळा ठरत असल्याने आईने आपल्या 6 वर्षांच्या मुलाचा प्रियकराच्या मदतीने खून केल्याचा प्रकार समोर आला आहे. या प्रकरणी दक्षिण म्हाळुंगे पोलिसांनी आईला अटक केली असून प्रियकराविरुद्ध गुन्हा दाखल करण्यात आला आहे. (Latest Marathi News)
बसरीन मेहबुब शेख (वय 27, रा. कुरुळी, ता. खेड) असे अटक करण्यात आलेल्या महिलेचे नाव आहे. तर आवेज मेहबुब शेख (वय 6) असे मृत मुलाचे नाव आहे. या प्रकरणात राम विनायक कजेवाड (रा. कुरुळी, ता. खेड) याच्यावरही गुन्हा दाखल करण्यात आला आहे.
पोलिसांनी दिलेल्या माहितीनुसार, बसरीन शेख हिचे लग्न मेहबुब शेख याच्यासोबत झाले होते. त्यांना आवेज हा मुलगा होता. दरम्यान, बसरीन हिचे राम कजेवाड याच्यासोबत प्रेमसंबंध जुळले. त्यानंतर ती मुलाला घेऊन चार महिन्यांपूर्वी पुण्यात आली आणि काम करू लागली.
मात्र, या दोघांच्या नात्यात मुलगा अडथळा ठरत असल्याने त्यांनी त्याचा खून करण्याचा कट रचला. 4 एप्रिल रोजी रात्री साडेअकरा वाजण्याच्या सुमारास त्यांनी बाथरूममध्ये पाण्याच्या बादलीत मुलाचे डोके बुडवून धरले. तो बेशुद्ध झाल्यानंतर त्याचे डोके भिंतीवर आणि जमिनीवर आपटून त्याचा खून केला.
घटनेनंतर दोघांनी मृतदेह घेऊन बीड जिल्ह्यातील माहेरी जाऊन मुलाचा मृत्यू हृदयविकाराच्या झटक्याने झाल्याचे सांगितले. मात्र, मुलाच्या आजोबांना संशय आल्याने त्यांनी पोलिसांना माहिती दिली.
पोलिसांनी मृतदेह शवविच्छेदनासाठी पाठवला असता जखमांमुळे मृत्यू झाल्याचे स्पष्ट झाले. त्यानंतर पोलिसांनी चौकशी केली असता आरोपी महिलेने गुन्ह्याची कबुली दिली. हा गुन्हा पुण्यात घडल्याने प्रकरण पुण्यात वर्ग करण्यात आले असून पुढील तपास पोलीस उपनिरीक्षक जायभाये करत आहेत.
