पुणे : भारती विद्यापीठ पोलिस ठाण्याच्या हद्दीत आरोपी आणि अल्पवयीन मुलांशी गैरवर्तन केल्याच्या आरोपावरून १७ पोलिस अधिकारी आणि कर्मचाऱ्यांविरोधात गुन्हा दाखल करण्यात आला आहे. दुखापत करणे, बेकायदा कोंडून ठेवणे, फौजदारी बळाचा वापर, अपमान, धमकावणे तसेच लोकसेवकाने कायद्याचे उल्लंघन करून इजा पोहोचविणे यांसह भारतीय न्याय संहितेतील विविध कलमांनुसार गुन्हा दाखल करण्यात आला आहे. यासोबतच बाल न्याय कायदा आणि अनुसूचित जाती-जमाती अत्याचार प्रतिबंधक कायद्याच्या तरतुदीही लागू करण्यात आल्या आहेत.
या प्रकरणात भारती विद्यापीठ पोलिस ठाण्याचे वरिष्ठ निरीक्षक मानसिंग पाटील, उपनिरीक्षक अण्णा मधुकर दराडे, नीलेश राजेंद्र मोकाशी, गणेश मोहिते, हवालदार सुनील हनवते, अंमलदार सागर बोरगे, सोहम शेंडकर, राहुल औधकर, दिनेश टापके, मितेश चोरमोले, रवींद्र गायकवाड, मंगेश पवार, सागर बारगे, संदीप आगळे, सुवर्णा भिसे, फकीर आणि सुतार यांचा आरोपींमध्ये समावेश आहे. या प्रकरणी सीआयडीचे उपअधीक्षक संकेत गोसावी यांनी दोन तक्रारी दिल्या आहेत.
भारती विद्यापीठ पोलिस ठाण्याच्या हद्दीत एका तरुणावर कुऱ्हाडीने वार करून खुनाचा प्रयत्न केल्याप्रकरणी चौघांना ५ जुलै रोजी पोलिसांनी अटक केली होती. दुसऱ्या दिवशी न्यायालयाने त्यांना पोलिस कोठडी सुनावली. त्यानंतर ७ जुलै रोजी या चौघांना लेक टाउनजवळील एसआरए कॉलनीतील पार्किंग परिसरात नेण्यात आले. तेथे त्यांना भररस्त्यात गुडघ्यावर चालण्यास सांगून लाठ्यांनी मारहाण करण्यात आल्याचा आरोप आहे.
दुसऱ्या प्रकरणात तीन अल्पवयीन मुलांना गाडीच्या बॉनेटवर बसवून त्यांची धिंड काढण्यात आल्याचा आरोप आहे. या घटनांशी संबंधित काही व्हिडिओ समाजमाध्यमांवर प्रसारित झाल्यानंतर मानवाधिकार आयोगाने या प्रकरणाची स्वतःहून दखल घेतली.
आयोगाचे अध्यक्ष न्यायमूर्ती ए. एम. बदर, सदस्या न्यायमूर्ती स्वप्ना जोशी आणि सदस्य संजयकुमार यांच्या पूर्ण पीठाने चौकशी समिती नेमली होती. विशेष पोलिस महानिरीक्षक दत्तात्रय कराळे, पोलिस अधीक्षक विश्वास पांढरे आणि आयोगाचे निबंधक विजय केदार यांच्या समितीने चौकशी करून अहवाल सादर केला. या अहवालात पोलिसांच्या कार्यपद्धतीवर ताशेरे ओढण्यात आल्याचे नमूद आहे.
तपासादरम्यान पोलिसांनी आरोपींना संबंधित कॉलनीत नेल्याची जनरल डायरीमध्ये नोंद नसल्याचे आढळले. पोलिसांच्या वाहनाच्या लॉगबुकमध्येही या हालचालीची नोंद नसल्याचे तथ्यशोधन अहवालात नमूद करण्यात आले आहे. मात्र, मानवाधिकार आयोगासमोर जबाब देताना भारती विद्यापीठ पोलिस ठाण्यातील काही पोलिस कर्मचाऱ्यांनी आपण घटनास्थळी उपस्थित असल्याचे मान्य केले. व्हिडिओमध्ये दिसणारा अधिकारी वरिष्ठ निरीक्षक मानसिंग पाटील असल्याची ओळखही पोलिस कर्मचाऱ्यांनी करून दिल्याचे सीआयडीच्या एफआयआरमध्ये नमूद आहे.
