Pune Solapur Accident : उरुळी कांचन, ता. 03 : पुणे – सोलापूर महामार्गावर (Pune Solapur Accident) भरधाव दुचाकी रस्ता दुभाजकाला धडकल्याने 51 वर्षीय व्यक्तीचा मृत्यू झाल्याची दुर्दैवी घटना घडली. सोरतापवाडी (ता. हवेली) ग्रामपंचायत हद्दीतील देवकर एच.पी. पेट्रोलपंपाजवळ ही घटना रविवारी (ता. 01) दुपारी सुमारे 3.30 वाजण्याच्या सुमारास घडली.
जगन्नाथ शरणअप्पा रेड्डी (वय 51, व्यवसाय मजुरी, मूळ रा. मगरवस्ती, आळंदी म्हातोबाची, ता. हवेली, सध्या रा. सोरतापवाडी, ता. हवेली) असे अपघातात मृत्यू झालेल्या व्यक्तीचे नाव आहे. याबाबत त्यांचा मुलगा अक्षय जगन्नाथ रेड्डी (वय 24, व्यवसाय जमीन खरेदी-विक्री, रा. सोरतापवाडी) यांनी उरुळी कांचन पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, अक्षय रेड्डी हे कुटुंबासोबत एकत्र राहतात व जमीन खरेदी-विक्रीचा व्यवसाय करतात. त्यांची आई नर्सरीमध्ये काम करते, तर वडील मजुरी करून कुटुंबाचा उदरनिर्वाह करत होते. रविवारी दुपारी सुमारे 3.30 वाजता जगन्नाथ रेड्डी यांनी देवकर एचपी पेट्रोलपंप, सोरतापवाडी येथून एमएच 12 डब्ल्यू एम 7499 क्रमांकाच्या स्प्लेंडर दुचाकीत पेट्रोल भरले व कुंजीरवाडीच्या दिशेने निघाले. दरम्यान, गाडीवरील नियंत्रण सुटल्याने दुचाकी रस्त्याच्या मधील दुभाजकाला जोरात धडकली.
या अपघातात ते गंभीर जखमी झाले. स्थानिक नागरिक आणि पोलिसांच्या मदतीने त्यांना तात्काळ उरुळी कांचन येथील सरकारी रुग्णालयात दाखल करण्यात आले. मात्र वैद्यकीय अधिकाऱ्यांनी तपासणी करून उपचारापूर्वीच त्यांना मृत घोषित केले.
प्राथमिक तपासात दुचाकी भरधाव व निष्काळजीपणे चालवल्यामुळे अपघात झाल्याचे समोर आले आहे. याप्रकरणी बीएनएस कलम 181, 125(ब), 106, 324(4) तसेच मोटार वाहन कायदा कलम 184 अंतर्गत गुन्हा नोंद करण्यात आला असून पुढील तपास उरुळी कांचन पोलीस करत आहेत.
