Pune Crime : पुणे: शहरातील सार्वजनिक वाहतुकीसाठी महत्त्वाची असलेल्या पुणे महानगर परिवहन महामंडळ लिमिटेड (Pune Mahanagar Parivahan Mahamandal Limited) या संस्थेला फसवण्यासाठी एका 24 वर्षीय तरुणाने बनावट मोबाईल अॅप तयार केल्याचा प्रकार समोर आला आहे. या अॅपच्या माध्यमातून तो मोफत दैनंदिन पास दाखवून बसने प्रवास करत होता. मात्र एका सतर्क वाहकाच्या लक्षात ही बाब आल्याने संपूर्ण प्रकार उघड झाला.
पीएमपीएमएलचे ‘आपली पीएमपीएमएल’ हे अधिकृत अॅप प्रवाशांना तिकीट आणि पास काढण्यासाठी उपलब्ध आहे. 26 फेब्रुवारी रोजी सकाळी तांत्रिक अडचणीमुळे या अॅपचा सर्व्हर बंद होता. त्यामुळे कोणालाही ऑनलाइन तिकीट किंवा पास मिळत नव्हता. त्याच दिवशी सातारा रस्त्यावरील बीआरटी मार्गावरून प्रवास करत असताना संबंधित तरुणाने आपल्या मोबाईलवर पास दाखवला.
अधिकृत अॅप बंद असताना पास कसा मिळाला, याबाबत वाहकाला संशय आला. चौकशी केल्यानंतर तरुणाने अधिकृत अॅपसारखे दिसणारे बनावट अॅप स्वतः तयार केल्याचे समोर आले. या अॅपद्वारे तो खोटा पास दाखवून विनामूल्य प्रवास करत असल्याचे उघड झाले.
हा तरुण उच्चशिक्षित असून काही दिवसांपूर्वीच त्याने हे अॅप तयार केल्याची माहिती आहे. या प्रकरणी कौस्तुभ मांजरेकर (रा. बालाजीनगर, पुणे) याच्याविरोधात सहकारनगर पोलीस ठाण्यात गुन्हा दाखल करण्यात आला आहे. पोलिसांकडून पुढील तपास सुरू आहे.
