पुणे: प्रसिद्ध रॅपर आणि गायक यो यो हनी सिंग याच्या (Yo Yo Honey Singh Pune Concert) ‘My Story – India Chapter’ टूरला मोठा प्रतिसाद मिळत असताना पुण्यातील चाहत्यांना मात्र निराशा पदरी पडली आहे. 4 एप्रिल रोजी पुण्यात होणारा त्याचा लाईव्ह कॉन्सर्ट अवकाळी पावसामुळे पुढे ढकलण्यात आला आहे.
या टूरचा पहिला शो 28 मार्च रोजी मुंबईतील वांद्रे येथील एमएमआरडीए ग्राऊंडवर झाला होता. या कार्यक्रमाला प्रचंड गर्दी झाली आणि शो चांगलाच गाजला. त्यामुळे पुण्यातील कॉन्सर्टबाबतही मोठी उत्सुकता होती. मात्र गेल्या काही दिवसांपासून पुण्यात सुरू असलेल्या अवकाळी पावसाने सगळेच गणित बिघडवले.
2 एप्रिलपासून पुणे आणि आसपासच्या भागात जोरदार पाऊस आणि काही ठिकाणी गारपीट झाली. यामुळे शेतीसह जनजीवनावर परिणाम झाला. अशा परिस्थितीत मोठा मैदानी कार्यक्रम घेणे धोक्याचे ठरू शकते, तसेच प्रेक्षकांच्या सुरक्षिततेचाही प्रश्न निर्माण होतो. त्यामुळे आयोजक आणि हनी सिंहच्या टीमने एकत्रित निर्णय घेत शो पुढे ढकलण्याचा निर्णय घेतला.
आता हा कॉन्सर्ट 18 एप्रिल रोजी आयोजित करण्यात येणार असल्याची माहिती देण्यात आली आहे. दरम्यान, हवामान खात्याकडून अजूनही काही भागांत पावसाची शक्यता वर्तवण्यात येत असल्याने आयोजकांनी खबरदारी घेतली आहे.
पुणे पोलिसांनीही या कार्यक्रमासाठी काही अटी घातल्या आहेत. कार्यक्रमादरम्यान मद्यविक्रीवर बंदी घालण्यात आली असून, स्टेजवर असभ्य किंवा आक्षेपार्ह भाषेचा वापर टाळण्याचे निर्देश देण्यात आले आहेत. मोठ्या गर्दीच्या पार्श्वभूमीवर सुरक्षा व्यवस्था कडक ठेवण्यावर भर देण्यात येणार आहे.
या बदलामुळे अनेक चाहत्यांची निराशा झाली असली, तरी सुरक्षिततेच्या दृष्टीने घेतलेला हा निर्णय महत्त्वाचा मानला जात आहे. आता 18 एप्रिलला होणाऱ्या शोची उत्सुकता अधिक वाढली आहे.
