पुण्यात दोन ठिकाणी दरोड्याचा डाव फसला; पुणे शहर पोलिसांच्या सतर्कतेमुळे 5 जण अटकेत तर 5 फरार

आंबेगाव येथून प्रथमेश ऊर्फ अभय देविदास कुडले (वय-24 , रा. गणेश कॉलनी दत्तनगर जांभळवाडी रोड आंबेगाव पुणे), राहूल नागेश माने (वय 29, रा. सिध्दिविनायक सोसायटी जांभुळवाडी रोड, आंबेगांव खुर्द पुणे) व प्रशांत दत्तात्रय माने (वय 26, रा. गायमुख चौक, आंबेगांव बु. पुणे असे अटक करण्यात आलेल्या आरोपींची नावे आहेत. तर दोन अनोळखी साथीदार फरार झाले आहेत. चंदननगर येथून आकाश आनंद बेत्ती (वय 20, रा.एस. के. डेअरीच्या मागे, बिडी कामगार वसाहत चंदननगर पुणे), अमोल वसंत चोरघडे (वय 23, रा.राजश्री कॉलनी, वडगांवशेरी पुणे) असे अटक करण्यात आलेल्या आरोपींची नावे आहेत. तर तीन अनोळखी साथीदार फरार झाले आहेत.

पोलिसांनी दिलेल्या माहितीनुसार, आंबेगांव खुर्द येथील जांभुळवाडी तलावाजवळ वरील आरोपी हे दरोडा घालण्याच्या उद्देशाने बेकायदेशीरपणे एकत्रितपणे रविवारी (ता.21) पहाटे दीड वाजण्याच्या सुमारास जमले होते. त्यांच्याजवळ एक लोखंडी कोयता, मिर्ची पावडर, नायलॉनची दोरी मिळून आली. आरोपींवर आंबेगांव पोलीस ठाण्यात भारतीय न्याय संहिता कलम 310 (4), 310(5), महाराष्ट्र पोलीस अधिनियम कलम 37(1) (3), 135, 142 व आर्म अॅक्ट कलम 4 (25) प्रमाणे गुन्हा दाखल करण्यात आला आहे.

दरम्यान, आरोपी प्रथमेश ऊर्फ अभय देविदास कडले याला महाराष्ट्र पोलीस अधिनियम कलम 56 (1) (अ) (ब) दिनांक 25 ऑगस्ट 2025 अन्वये दिनांक 26 ऑगस्ट 2025 रोजी पासून पुणे शहर व पिंपरी चिंचवड  जिल्ह्यातून तडीपार केले असताना तो मिळून आला आहे. पुढील तपास पोलीस उपनिरीक्षक मोहन कळमकर करीत आहेत.

दुसऱ्या घटनेत, पुणे पोलीस आयुक्तालयाच्या क्षेत्रात शस्त्रे, सोटे, तलवारी, शारिरीक इजा करण्यासाठी वापरात येईल अशी कोणतीही वस्तु जवळ बाळगण्यास बंदी आदेश असताना, वरील आरोपींनी सदर प्रतिबंधात्मक आदेशाचा भंग केला आहे. त्यांच्याजवळ बेकायदेशीररित्या व अनधिकृतपणे घातक शस्त्रे बेकायदेशीररित्या घेऊन जमले होते. हत्याराची व साथीदारांची जमवाजमव करून, दरोडा टकाण्याची पुर्ण तयारीनिशी जमले असताना चंदननगर परिसरात मिळुन आले.

त्यांच्यावर चंदननगर पोलीस ठाण्यात भारतीय न्याय संहिता कलम 310 (4), 310(5), आर्म अॅक्ट क. 4(25) महाराष्ट्र पोलीस अधिनियम कलम 37 (1) (3),135 प्रमाणे गुन्हा दाखल करण्यात आला आहे. पुढील तपास पोलीस उपनिरीक्षक रविंद्र ढावरे करीत आहेत.