Pune Railway Accident: पुणे : पुणे ते सातारा डेमो रेल्वेतून उतरताना एका 18 वर्षीय तरुणाचा भीषण अपघात (Accident) झाल्याची धक्कादायक घटना नीरा रेल्वे स्थानकावर घडली आहे. या अपघातात तरुणाचे दोन्ही पाय चिरडले गेले असून त्याची प्रकृती गंभीर आहे. घटनेनंतर रेल्वे प्रशासनाकडून तातडीची मदत न मिळाल्याने प्रवाशांनी संताप व्यक्त केला आहे.
हेही वाचा- उरुळी कांचन येथे 50 टक्के सवलतीमुळे घरपट्टी भरण्यासाठी नागरिकांची झुंबड; दोन दिवसात 55 लाख रुपये जमा
मिळालेल्या माहितीनुसार सोमेश्वरनगर, तालुका बारामती येथील आदित्य साहेबराव होळकर हा तरुण सोमवारी सायंकाळी पुणे-सातारा डेमो रेल्वेतून नीरा रेल्वे स्थानकावर उतरत होता. गाडी थांबत असतानाच उतरण्याचा प्रयत्न करताना त्याचा पाय घसरला आणि तो थेट रुळांवर पडला. त्याच वेळी रेल्वे पुढे सरकल्याने या अपघातात आदित्यचे दोन्ही पाय चिरडले गेले.
अपघातानंतर स्थानकावर एकच गोंधळ उडाला. प्रत्यक्षदर्शींनी दिलेल्या माहितीनुसार, घटनेनंतर काही वेळ कोणतीही मदत उपलब्ध झाली नाही. रेल्वे पोलीस, आरपीएफ किंवा स्टेशनवरील कर्मचारी तातडीने मदतीसाठी पुढे आले नसल्याचा आरोप प्रवाशांनी केला आहे. अधिक धक्कादायक बाब म्हणजे, रेल्वे स्थानकातील पोलीस मदत केंद्राला कुलूप असल्याचे प्रवाशांच्या लक्षात आले.
अपघातग्रस्त तरुण रुळांवर जखमी अवस्थेत पडलेला असताना काही प्रवाशांनी स्वतः पुढाकार घेत त्याला मदत केली. स्थानिक नागरिकांच्या मदतीने अखेर रुग्णवाहिका बोलावण्यात आली आणि त्याला तातडीने जवळच्या रुग्णालयात दाखल करण्यात आले. सध्या त्याच्यावर उपचार सुरू असून त्याची प्रकृती चिंताजनक असल्याची माहिती आहे.
या घटनेनंतर नीरा रेल्वे स्थानकावरील सुरक्षेचा प्रश्न पुन्हा एकदा ऐरणीवर आला आहे. लहान स्थानकांवर पुरेशी सुरक्षा व्यवस्था, कर्मचारी उपस्थिती आणि आपत्कालीन मदत उपलब्ध नसल्याने अशा घटना घडत असल्याचा आरोप प्रवाशांकडून करण्यात येत आहे. रेल्वे प्रशासनाने या घटनेची गंभीर दखल घेऊन योग्य चौकशी करावी आणि भविष्यात अशा घटना टाळण्यासाठी ठोस उपाययोजना कराव्यात, अशी मागणी प्रवासी आणि स्थानिक नागरिकांकडून होत आहे.
