Pune News: पुणे : पुण्यातील प्रसिद्ध सोशल मीडिया इन्फ्लुएन्सर अथर्व सुदामे याच्या वादग्रस्त रीलनंतर पुणे महानगर परिवहन महामंडळाने कठोर भूमिका घेतली आहे. पीएमपीएमएल (PMPML) प्रशासन अॅक्शन मोडमध्ये आले असून, बसमध्ये फोटो, व्हिडिओ किंवा रील्स (Reels) बनवण्यावर कडक निर्बंध घालण्यात आले आहेत. या संदर्भात सर्व आगारांना नवीन नियमावली जारी करण्यात आली आहे.
हेही वाचा- भररस्त्यातून उचललं, विवस्त्र केलं आणि मग…, संतापजनक! पुण्यात 9 जणांनी तरुणासोबत नेमकं काय केलं
थेट कायदेशीर कारवाई
पीएमपीचे अध्यक्ष आणि व्यवस्थापकीय संचालक पंकज देवरे यांनी दिलेल्या आदेशानुसार, आता पीएमपीच्या कोणत्याही बसमध्ये कोणत्याही प्रकारचे चित्रीकरण करण्यास अधिकृत बंदी घालण्यात आली आहे. पूर्वपरवानगीशिवाय फोटो किंवा व्हिडिओ शूटिंग केल्यास थेट कायदेशीर कारवाई करण्यात येणार आहे. अशा प्रकरणांमध्ये संबंधितांवर गुन्हा दाखल केला जाईल, असे प्रशासनाने स्पष्ट केले आहे.
निमय मोडल्यास महागात पडेल
या नियमावलीनुसार केवळ बाहेरील व्यक्तींवरच नव्हे, तर पीएमपीचे चालक आणि वाहक यांच्यावरही लक्ष ठेवण्यात येणार आहे. सेवेवर असताना गणवेशात व्हिडिओ बनवणे, ई-तिकिटिंग मशीनचा वापर करून रील शूट करणे किंवा सोशल मीडिया इन्फ्लुएन्सर्सना सहकार्य करणे, हे शिस्तभंगाचे कृत्य मानले जाणार आहे. अशा कर्मचाऱ्यांवर कडक प्रशासकीय कारवाई करण्याचे आदेश देण्यात आले आहेत.
अर्थव सुदामेचा व्हिडिओ चर्चेत
काही दिवसांपूर्वी अथर्व सुदामे याने पीएमपी बसमध्ये एक रील शूट केली होती. या रीलमध्ये पीएमपीचा गणवेश, ई-तिकिटिंग मशीन आणि बॅज यांचा वापर करण्यात आला होता. तसेच प्रवाशांना दाखवण्याची पद्धत आक्षेपार्ह असल्याचा दावा करण्यात आला होता. या प्रकरणी पीएमपी प्रशासनाने अथर्व सुदामे याला कायदेशीर नोटीस बजावली होती.
महामंडळाच्या प्रतिमेला धक्का बसत असल्याचे कारण देत हे नवे नियम लागू करण्यात आले आहेत. ही नियमावली पीएमपीच्या स्वतःच्या बससोबतच ठेकेदारांच्या बसलाही लागू असणार आहे. त्यामुळे यापुढे पीएमपी बसमध्ये रील्स बनवणे सोशल मीडिया इन्फ्लुएन्सर्स आणि यूट्यूबर्सना अडचणीचे ठरण्याची शक्यता आहे.
