प्रतिनिधी अमित मुंडीक
Pune Police: पुणे: पुणे शहरातील वाहतूक शिस्त अबाधित ठेवण्यासाठी आणि नागरिकांच्या प्राणसुरक्षेस प्राधान्य देण्यासाठी पुणे शहर वाहतूक विभागाकडून मद्यपान करून वाहन चालवणारे तसेच ट्रिपल सीट दुचाकी वाहनचालकांविरोधात विशेष कारवाई मोहीम राबविण्यात आली. ही कारवाई दिनांक 2 जानेवारी 2026 ते 4 जानेवारी 2026 या कालावधीत करण्यात आली.
या मोहिमेदरम्यान मद्यपान करून वाहन चालवणाऱ्या एकूण 232 वाहनचालकांवर मोटार वाहन अधिनियम कलम 185 अंतर्गत कायदेशीर कारवाई करण्यात आली. तसेच ट्रिपल सीट दुचाकी चालवणाऱ्या 720 वाहनचालकांवर कारवाई करण्यात आली असून त्यापैकी 121 मोटारसायकल वाहने जप्त करण्यात आली आहेत.
वाहतूक नियमांचे उल्लंघन केल्यामुळे अपघातांचा धोका वाढतो आणि निष्पाप नागरिकांच्या जीवितास धोका निर्माण होतो. त्यामुळे सर्व वाहनचालकांनी मोटार वाहन अधिनियमातील नियमांचे काटेकोर पालन करून वाहतूक व्यवस्थेस सहकार्य करावे, असे आवाहन पुणे शहर वाहतूक विभागाच्या वतीने करण्यात आले आहे.
