Pune News : दौंड, ता. 15 : शहरातील डॉ. बाबासाहेब आंबेडकर चौक परिसरात आंबेडकर जयंतीच्या पार्श्वभूमीवर मंगळवारी (ता. 14) पहाटे अडीच वाजण्याच्या सुमारास तणावपूर्ण वातावरण निर्माण झाले. साऊंड सिस्टमवरून सुरू झालेला किरकोळ वाद काही क्षणातच दोन गटांतील उग्र भांडणात परिवर्तित झाला. झोंबाझोंबी, ढकलाढकली आणि आरडाओरड यामुळे परिसरात एकच खळबळ उडाली. या प्रकरणी दौंड पोलीस ठाण्यात 9 जणांवर गुन्हा दाखल करण्यात आला असून, पोलिसांच्या तत्पर हस्तक्षेपामुळे मोठा अनर्थ टळल्याची माहिती समोर आली आहे.
शुभम प्रदीप गव्हाणे, प्रशांत भास्कर सोनवणे, सिंध्दांत अनिल सोनवणे, राहुल शिवाजी शेंडगे, आशिष दिलीप गायकवाड, बुद्धभूषण अनिल सरोदे, अनिकेत गौतम मिसाळ, सागर गायकवाड व हिमांशू गायकवाड अशी गुन्हा दाखल करण्यात आलेल्यांची नावे आहेत. याप्रकरणी पोलीस उपनिरीक्षक बबन जयवंत जाधव (वय 54) यांनी सरकारच्या वतीने दौंड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, पोलीस उपनिरीक्षक बबन जाधव व त्यांच्या सहकाऱ्यांवर 13 एप्रिल रोजी रात्री 11 वाजल्यापासून ते 14 एप्रिल सकाळी 9 वाजेपर्यंत रात्रगस्त कर्तव्य सोपवण्यात आले होते. पहाटे सुमारे 2.30 वाजण्याच्या सुमारास डॉ. बाबासाहेब आंबेडकर चौक येथे तैनात असलेल्या पोलिसांकडून गोंधळ सुरू असल्याची माहिती मिळाली. या ठिकाणी आंबेडकर पुतळ्याच्या बंदोबस्तासाठी पोलीस कर्मचारी व होमगार्ड तैनात होते. त्याचवेळी काही युवक चौकात जमले होते. साऊंड वाजवण्याच्या कारणावरून दोन गटांमध्ये जोरदार वाद सुरू झाला. पोलिसांनी त्यांना समजावण्याचा प्रयत्न केला, मात्र आरोपींनी पोलिसांचे आदेश धुडकावून लावत एकमेकांवर झडप घातली. काही क्षणांतच परिस्थिती नियंत्रणाबाहेर जाण्याची चिन्हे दिसू लागली.
दरम्यान, घटनास्थळी अतिरिक्त पोलीस पथक दाखल झाले. पोलीस उपनिरीक्षक, फौजदार, पोलीस कॉन्स्टेबल आणि होमगार्ड यांनी मिळून संबंधितांची झोंबाझोंबी सोडवली आणि परिस्थिती नियंत्रणात आणली. जमावाला तात्काळ पांगवण्यात आले. पोलिसांनी वेळेवर हस्तक्षेप केल्यामुळे कोणतीही मोठी दुर्घटना घडली नाही. शहरातील संवेदनशील भागात घडलेल्या या घटनेमुळे काही काळ तणावाचे वातावरण निर्माण झाले होते. मात्र पोलिसांच्या वेळीच केलेल्या कारवाईमुळे परिस्थिती नियंत्रणात आली.
या प्रकरणी आरोपींच्या विरोधात दौंड पोलीस ठाण्यात भारतीय न्याय संहिता 2023 च्या कलम 194(2) अंतर्गत गुन्हा दाखल करण्यात आला आहे. या प्रकरणाचा पुढील तपास पोलीस हवालदार पवार करत असून, आणखी काही जणांचा सहभाग असल्याची शक्यता नाकारता येत नाही.
