Pune News : पुणे: मावळ तालुक्यातील लोणावळा ग्रामीण हद्दीतील वेहेरेगावी येथे 26 मार्च रोजी श्री एकविरा देवी चैत्री यात्रा उत्सव 2026 पार पडणार आहे. या यात्रेदरम्यान मोठ्या प्रमाणात भाविक उपस्थित राहणार असल्याने कायदा आणि सुव्यवस्था राखण्यासाठी प्रशासनाने विशेष खबरदारी घेतली आहे. या पार्श्वभूमीवर जिल्हाधिकारी जितेंद्र डुडी यांनी वाहतूक व्यवस्थेत तात्पुरते बदल करण्याचे आदेश दिले आहेत.
यात्रेच्या दिवशी म्हणजे 26 मार्च रोजी रात्री 12 वाजेपर्यंत या भागातील काही मार्गांवरील वाहतूक बंद ठेवून पर्यायी मार्गाने वळवण्यात येणार आहे. मावळ तालुक्यातील कार्ला फाट्याकडून एकविरा पायथा मंदिराकडे जाणाऱ्या वाहनांना प्रवेश बंद करण्यात आला आहे. या मार्गावरील वाहने अग्रसेन हॉटेल वाहनतळ, लाजवंती महाविद्यालय वाहनतळ आणि दुर्गा परमेश्वरी वाहनतळ येथे वळवली जाणार आहेत.
तसेच 25 मार्चच्या रात्री 12 वाजल्यापासून ते 26 मार्चला रात्री 12 वाजेपर्यंत जुना पुणे-मुंबई महामार्गावरील वडगाव फाटा ते कुसगाव बु. टोलनाका या दरम्यान जड वाहतुकीस बंदी घालण्यात आली आहे. या काळात जड वाहने मुंबई-पुणे महामार्गाचा पर्यायी मार्ग वापरतील.
याचप्रमाणे कुसगाव बु. टोलनाका ते वडगाव फाटा या मार्गावरही जड वाहतूक बंद राहणार आहे. भाविकांची हलकी वाहने वगळता इतर सर्व जड आणि अवजड वाहने पर्यायी मार्गाने वळवण्याचे आदेश देण्यात आले आहेत.
यात्रेसाठी येणाऱ्या नागरिकांनी प्रशासनाने दिलेल्या सूचनांचे पालन करावे आणि वाहतूक नियमांचे पालन करून सहकार्य करावे, असे आवाहन प्रशासनाकडून करण्यात आले आहे.
