Pune News: पुणे : पुणे महापालिकेच्या उपमहापौर कार्यालयामध्ये कार्यकर्त्यांच्या दोन गटात जोरदार हाणामारी झाल्याची धक्कादायक घटना समोर आली आहे. डॉ. बाबासाहेब आंबेडकर यांच्या 14 एप्रिल रोजी होणाऱ्या जयंतीनिमित्त पुणे स्टेशन परिसरातील पुतळ्यापाशी महापालिकेकडून एकच मोठा मंडप उभारण्याचा निर्णय घेण्यात आला आहे. या निर्णयानुसार प्रशासनाने तेथील छोटे स्वागत मंडप आणि बॅनर हटवण्याची कारवाई सुरू केली आहे. याच कारवाईदरम्यान ताडीवाला रस्ता परिसरातील एक लहान मंडप काढण्यात आल्यामुळे स्थानिक कार्यकर्त्यांमध्ये तीव्र नाराजी पसरली होती.
याप्रकरणी तक्रार करण्यासाठी काही कार्यकर्ते उपमहापौर परशुराम वाडेकर यांच्या दालनात गेले होते. त्यावेळी तिथे आधीच काही इतर कार्यकर्ते उपस्थित होते. चर्चेदरम्यान जयदेव रंधवे नावाच्या व्यक्तीने तक्रार घेऊन आलेल्यांना उद्देशून वादग्रस्त विधान केले, ज्यामुळे वातावरणात तणाव निर्माण झाला. या साध्या वादाचे रूपांतर पाहता पाहता मोठ्या हाणामारीत झाले. दोन्ही गट एकमेकांवर खुर्च्या उचलून धावून गेले आणि एका कार्यकर्त्याला कपडे फाटेपर्यंत बेदम मारहाण करण्यात आली. या प्रकारामुळे उपमहापौर कार्यालयाला जणू युद्धभूमीचे स्वरूप आले होते.
घटनेची माहिती मिळताच महापालिकेच्या सुरक्षा रक्षकांनी तातडीने धाव घेतली. मारहाण झालेल्या तरुणाने आपल्या इतर सहकाऱ्यांनाही महापालिकेत बोलावून घेतल्याने परिसरात काही काळ तणावाचे वातावरण होते. संबंधित हल्लेखोराला पोलिसांच्या ताब्यात देण्याची मागणी कार्यकर्त्यांनी लावून धरली होती. या प्रकरणावर स्पष्टीकरण देताना उपमहापौर परशुराम वाडेकर यांनी सांगितले की, केवळ मंडप काढल्याच्या कारणावरून ही वादावादी झाली असून त्यामागे कार्यकर्त्यांचे जुने वादही कारणीभूत असू शकतात. रात्री उशिरापर्यंत या वादावर पडदा टाकण्यासाठी उपमहापौर कार्यालयात बैठकांचे सत्र सुरू होते.
