यवत, ता. 28 : दौंड पोलीस ठाण्याच्या हद्दीतील लडकतवाडी (सौदलवाडी) गावच्या हद्दीत (Dand News) बेकायदेशीररीत्या सुरू असलेल्या गावठी हातभट्टीवर यवत पोलिसांनी छापा टाकला. या कारवाईत दारू (Pune Crime) गाळण्याचे साहित्य आणि कच्चे रसायन असा एकूण 48 हजार 500 रुपयांचा मुद्देमाल जप्त करण्यात आला आहे. पोलिसांची चाहूल लागताच संशयित महिला आरोपी अंधाराचा फायदा घेऊन पसार झाली आहे. हि कारवाई शुक्रवारी (ता. 27) रात्री पाऊणे अकरा वाजण्याच्या सुमारास करण्यात आली. (Latest Marathi News)
मंगल श्रीनिवास गुदडावत (रा. कासुर्डी, ता. दौंड) असे फरार झालेल्या महिलेचे नाव आहे. याप्रकरणी यवत पोलीस ठाण्याचे हवालदार रामदास ज्ञानदेव जगताप यांनी यवत पोलीस ठाण्यात फिर्याद दिली आहे. त्यानुसार महिलेवर गुन्हा दाखल करण्यात आला आहे.
पोलिसांनी दिलेल्या माहितीनुसार, यवत पोलीस ठाण्याचे हवालदार रामदास ज्ञानदेव जगताप आणि त्यांच्या पथकाला लडकतवाडी येथील सौदलवाडी परिसरात बेकायदा हातभट्टी सुरू असल्याची गोपनीय माहिती मिळाली होती. त्यानुसार रात्री रात्री पाऊणे अकरा वाजण्याच्या सुमारास पोलिसांनी सदर ठिकाणी छापा टाकला.
यावेळी घराच्या जवळच मानवी जीवितास हानीकारक असलेल्या नशाकारक विषारी दारूची भट्टी धगधगत असल्याचे दिसून आले. पोलिसांना पाहताच आरोपी महिला मंगल गुदडावत ही पळून जाण्यात यशस्वी झाली. यावेळी पोलिसांनी 100 लिटर कच्चे रसायन यामध्ये नवसागर, गूळ, झाडाची सालं आणि भिजवलेली पोती असे 38 हजार 500 रुपयांचा मुद्देमाल मिळून आला. तसेच 35000 रुपये किमतीचे 35 लिटर तयार दारू आणि प्लॅस्टिक कॅन, व इतर साहित्य असा 48 हजार 500 रुपयांचा मुद्देमाल जप्त करण्यात आला.
दरम्यान, जप्त केलेले 1100 लिटर कच्चे रसायन हे अत्यंत विषारी आणि मानवी आरोग्यास घातक असल्याने पोलिसांनी ते जागीच नष्ट केले आहे. याप्रकरणी यवत पोलीस ठाण्यात भारतीय न्याय संहिता (BNS) कलम 123 आणि महाराष्ट्र दारूबंदी अधिनियमाच्या विविध कलमान्वये गुन्हा दाखल करण्यात आला आहे. तपास पोलीस हवालदार भापकर करीत आहेत.
