पुणे: पुण्यामध्ये (Pune News) चांदणी चौक परिसरात एका कार चालकाने दारूच्या नशेत गाडी चालवत रस्त्याच्या बाजूला उभ्या असलेल्या डिलिव्हरी बॉयला चिरडल्याची धक्कादायक घटना समोर आली आहे. या भीषण अपघातात प्रसाद दिलीप मिसाळ हा 26 वर्षांचा तरुण गंभीर जखमी झाला आहे. कारचे चाक थेट छातीवरून गेल्याने या तरुणाच्या बरगड्यांना गंभीर इजा झाली असून तो सध्या मृत्यूशी झुंज देत आहे.
प्रसाद हा एका ऑर्डरसाठी चांदणी चौकात थांबला होता. त्याने दुचाकी सुरक्षित ठिकाणी उभी केली होती, मात्र मागून येणाऱ्या भरधाव कारने त्याला जोराची धडक दिली. या कारचा चालक तेजस बाबुलाल चौधरी हा मद्याच्या नशेत असल्याचे प्राथमिक तपासात उघड झाले आहे. धडक बसल्यानंतर प्रसाद खाली पडला आणि त्याच स्थितीत कारचे चाक त्याच्या अंगावरून गेले.
या अपघातात त्याच्या हातापायांनाही मोठी जखमा झाल्या असून त्याला तातडीने उपचारासाठी रुग्णालयात दाखल करण्यात आले आहे. पुणे पोलिसांनी या प्रकरणी आरोपी कार चालकावर गुन्हा नोंदवला असून त्याला ताब्यात घेतले असून या प्रकरणी सखोल तपास सुरू आहे.
