पुणे: बारा ज्योतिर्लिंग दर्शनासाठी निघालेल्या पुण्याच्या (Pune News) मांजरी परिसरातील तीन तरुणांचा गुजरातमध्ये भीषण रस्ते अपघातात मृत्यू झाला. तेजस दगडे, अभिषेक यादव आणि सचिन बिरादार असे तिघांचे नाव आहे. तीन मित्रांचा अपघाती मृत्यू झाल्यामुळे संपूर्ण मांजरी बुद्रुक गावावर शोककळा पसरली आहे.
समोर आलेल्या माहितीनुसार, हे तिघे मित्र गेल्या 18 दिवसांपासून आनंदाने देवदर्शनासाठी प्रवास करत होते. तीर्थयात्रा पूर्ण करून पुण्यात येतांना मंगळवारी पहाटे दोनच्या सुमारास काळाने झडप घातली. गुजरातच्या दाहोद जिल्ह्यातील इंदूर-अहमदाबाद महामार्गावरील धाधेला वळणावर त्यांची कार अनियंत्रित झाली. वेगात असलेली ही कार दुभाजकाला (डिव्हायडर) इतक्या जोरात धडकली की, तिचा अक्षरशः चक्काचूर झाला.
धडक इतकी भयानक होती की, कारचं इंजिन तुटून थेट बाजूच्या शेतात फेकलं गेलं. यात 2 जणांचा जागीच मृत्यू झाला, तर एकाचा रुग्णालयात उपचारादरम्यान मृत्यू झाला.
