अमित मुंडीक
पुणे: पुणे महानगरपालिका (Pune Election) सार्वत्रिक निवडणूक २०२५–२६ च्या पार्श्वभूमीवर ४१ प्रभागांतून १६५ नगरसेवकांच्या निवडणुकीसाठी १५ निवडणूक (Pune Mahapalika Election) निर्णय अधिकारी कार्यालयांची स्थापना करण्यात आली आहे. या कार्यालयांमार्फत आज दिनांक २३ डिसेंबर २०२५ रोजी एकूण २८८६ नामनिर्देशन अर्जांची विक्री करण्यात आली असल्याची माहिती निवडणूक प्रशासनाकडून देण्यात आली आहे. (Local Body Election)
नामनिर्देशन अर्जांची सर्वाधिक विक्री कसबा–विश्रामबागवाडा निवडणूक निर्णय अधिकारी कार्यालयातून (३०० अर्ज) झाली असून, सर्वात कमी विक्री कोंढवा–येवलेवाडी कार्यालयातून (५१ अर्ज) झाल्याचे स्पष्ट करण्यात आले आहे.
इतर कार्यालयांमधील अर्ज विक्रीचा तपशील असा आहे—
येरवडा–कळस–धानोरी व नगर रोड–वडगाव शेरी येथे प्रत्येकी १९५ अर्ज, कोथरूड–बावधन १९४, औंध–बाणेर ७३, शिवाजीनगर–घोले रोड २७५, के. वा. स. होले पाटील रोड १७५, हडपसर–मुंडवा १९९, वानवडी–रामटेकडी १९९, बिबवेवाडी २२१, भवानी पेठ १९१, वारजे–कर्वेनगर २२१, सिंहगड रोड १९७ आणि धनकवडी–सहकारनगर २०० अर्जांची विक्री करण्यात आली आहे.
दरम्यान, आज कोणत्याही निवडणूक निर्णय अधिकारी कार्यालयात कोणत्याही उमेदवाराने नामनिर्देशनपत्र दाखल केलेले नाही, असेही प्रशासनाने स्पष्ट केले आहे. निवडणूक प्रक्रिया मुक्त, पारदर्शी व निर्भयपणे पार पडावी, यासाठी पुणे महानगरपालिका हद्दीत आदर्श आचारसंहितेच्या अंमलबजावणीसाठी विविध पथके कार्यान्वित करण्यात आली असून, निवडणूक प्रक्रियेवर काटेकोर लक्ष ठेवण्यात येणार आहे.
