Pune Crime : पुणे : पुणे शहरातील मुंडवा परिसरातील केशवनगर येथे बेकायदेशीर पिस्तूल निष्काळजीपणे हाताळल्यामुळे गोळी सुटून एका अल्पवयीन मुलगा गंभीर जखमी झाल्याची घटना समोर आली आहे. मित्रांमध्ये शस्त्र दाखवताना हा प्रकार घडला असून या प्रकरणात पोलिसांनी तीन जणांना अटक केली आहे, तर एका अल्पवयीन मुलाला ताब्यात घेतले आहे.
अटक करण्यात आलेल्या आरोपींमध्ये सक्षम युवराज गायकवाड (वय 19), ओम दुर्गा गायकवाड (वय 19) आणि सोनू मुंडे (वय 21) यांचा समावेश आहे. हे सर्वजण मुंडवा आणि आसपासच्या भागातील रहिवासी आहेत. पोलिसांनी दिलेल्या माहितीनुसार, संबंधित आरोपींची पूर्वीची गुन्हेगारी नोंदही असल्याचे समोर आले आहे.
ही घटना 18 मार्च रोजी रात्री सुमारे 9.30 वाजण्याच्या सुमारास केशवनगरमधील गुरुकृपा सोसायटीजवळील मोकळ्या जागेत घडली. काही तरुण तिथे एकत्र आले होते आणि त्यापैकी एकाने आणलेले गावठी पिस्तूल ते एकमेकांना दाखवत होते. निष्काळजीपणे शस्त्र हाताळताना एकाने पिस्तूल परत घेतले आणि ते एका अल्पवयीन मुलावर रोखले. त्याने ट्रिगर दाबताच गोळी सुटली आणि ती मुलाच्या कमरेत लागली.
जखमी मुलाला तातडीने रुग्णालयात दाखल करण्यात आले असून त्याच्यावर उपचार सुरू आहेत. घटनेची माहिती मिळताच वरिष्ठ पोलिस अधिकाऱ्यांनी घटनास्थळी भेट देत परिस्थितीचा आढावा घेतला. या प्रकरणाचा पुढील तपास सुरू असून पोलिसांकडून अधिक माहिती गोळा करण्यात येत आहे.
दरम्यान, शहरात बेकायदेशीर शस्त्रांचा वापर वाढत असल्याची चिंता व्यक्त होत आहे. अशा प्रकारच्या घटना टाळण्यासाठी कठोर कारवाईची गरज असल्याचे मत व्यक्त केले जात आहे.
