पुणे: पौड फाटा परिसरात मध्यरात्री घडलेल्या मारहाणीच्या (Pune Crime) घटनेने परिसरात खळबळ उडाली आहे. “माझ्या मैत्रिणीशी का बोलतो?” या कारणावरून टोळक्याने एका 21 वर्षीय तरुणावर हल्ला करून त्याला गंभीर जखमी केल्याचा प्रकार उघड झाला आहे. ही घटना 24 फेब्रुवारी रोजी पहाटे सुमारे 2 वाजण्याच्या सुमारास मेगासिटी रोडवर घडली.
या प्रकरणी 21 वर्षीय तरुणाने कोथरूड पोलीस स्टेशन येथे फिर्याद दिली आहे. त्यानुसार चार जणांविरुद्ध गुन्हा दाखल करण्यात आला आहे. फिर्यादी वाकडेवाडी येथे नोकरी करतात. काही दिवसांपूर्वी पत्रकारनगर परिसरात आरोपींपैकी एकाने “तू माझ्या मैत्रिणीशी का बोलतोस?” असा जाब विचारत वाद घातला होता. त्या वेळी ओळखीचे असल्याने तक्रार देण्यात आली नव्हती.
मात्र 24 फेब्रुवारीच्या रात्री फिर्यादी आपल्या मित्रासोबत रस्त्यावर उभे असताना तिन्ही गाड्यांवरून आरोपी तेथे आले. बोलण्याच्या बहाण्याने बाजूला येण्यास सांगितले. फिर्यादी न गेल्याने शिवीगाळ सुरू झाली आणि लगेचच मारहाण करण्यात आली. लाथाबुक्क्यांनी मारहाण केल्यानंतर एका आरोपीने धारदार हत्याराने वार केल्याचा आरोप आहे. स्वतःचा बचाव करताना फिर्यादीच्या हाताला आणि नंतर डोक्याला गंभीर दुखापत झाली. त्यांना वाचवण्यासाठी पुढे आलेल्या मित्रालाही मारहाण करण्यात आली.
जखमी अवस्थेत फिर्यादीने ससून हॉस्पिटल येथे उपचार घेतल्यानंतर पोलिसांत तक्रार दाखल केली. पोलिसांनी गुन्हा नोंदवून तपास सुरू केला आहे. परिसरातील सीसीटीव्ही फुटेजची तपासणी तसेच संबंधित आरोपींचा शोध घेण्याचे काम सुरू असल्याची माहिती पोलिसांकडून देण्यात आली आहे.
