Pune Crime: पुणे : पुणे शहरातून एक धक्कादायक घटना समोर येत आहे. ज्या सुनेला सासरच्या जाचाने कंटाळून जीव गमवावा लागला असा समज करून, तिच्या सासरच्या मंडळींवर हुंडाबळीचा गंभीर गुन्हा दाखल झाला होता, तीच महिला चक्क पाच महिन्यांनंतर पुण्यात धडधाकट अवस्थेत फिरताना सापडली. एखाद्या क्राईम थ्रिलर सिनेमात शोभावं असं हे प्रकरण असून, या एका चुकीच्या आरोपाने एका कुटुंबाची सामाजिक प्रतिष्ठा तर धुळीला मिळालीच, पण पोलीस तपासावरही मोठे प्रश्नचिन्ह निर्माण केले आहे. ज्या महिलेच्या हत्येचा तपास पोलीस करत होते, ती जिवंत सापडल्याने आता पोलीस प्रशासनाची मोठी खळबळ माजली. Crime News
मिळालेल्या माहितीनुसार, उत्तर प्रदेशातील श्रावस्ती जिल्ह्यातील लक्ष्मणपूर गंगापूर येथील रहिवासी असलेल्या दीपा हिचा विवाह ओरीपुरवा येथील हंसराज याच्याशी झाला होता. लग्नानंतर काही काळातच दीपा अचानक बेपत्ता झाली. ऑगस्ट 2025 पासून तिचा कोणताही पत्ता लागत नव्हता. कुटुंबीय आणि नातेवाईकांनी सर्वत्र शोध घेतला, मात्र ती सापडली नाही.
दीपा बेपत्ता झाल्यानंतर तिच्या माहेरच्या लोकांनी सासरच्या मंडळींवर गंभीर आरोप केले. हुंड्यासाठी दीपाची हत्या करून मृतदेहाची विल्हेवाट लावण्यात आल्याचा आरोप करत त्यांनी पोलिसांकडे तक्रार दिली. सुरुवातीला पोलिसांनी गुन्हा दाखल करण्यास टाळाटाळ केली. त्यानंतर दीपाच्या आई-वडिलांनी न्यायालयात धाव घेतली. न्यायालयाच्या आदेशानंतर दीपाचा पती हंसराज, सासरे परमेश्वर आणि सासू यांच्याविरुद्ध हत्येचा गुन्हा नोंदवण्यात आला. या प्रकरणाचा तपास गुन्हे अन्वेषण शाखेकडे सोपवण्यात आला.
तपासादरम्यान अधिकारी सतीश शर्मा यांनी दीपाच्या मोबाईलचा तांत्रिक डेटा तपासला. यामध्ये तिचे लोकेशन पुणे शहरात असल्याचे समोर आले. या माहितीच्या आधारे पोलिसांनी पुण्यात शोध घेऊन दीपाला ताब्यात घेतले.
पोलिस चौकशीत दीपाने धक्कादायक खुलासा केला. कोणाच्याही दबावाखाली न येता आपण स्वतःच्या मर्जीने घर सोडून पुण्यात आलो असल्याचे तिने सांगितले. सध्या पोलिसांनी दीपाला श्रावस्तीत नेले असून तिला न्यायालयात हजर केले जाणार आहे. तिच्या जबाबानंतर सासरच्या मंडळींवरील हत्येचे कलम काढले जाणार की पुढील कायदेशीर प्रक्रिया काय असेल, हे स्पष्ट होणार आहे. एका जिवंत व्यक्तीच्या हत्येचा गुन्हा दाखल झाल्याने हे प्रकरण सर्वत्र चर्चेचा विषय ठरले आहे.
