Pune Crime : पुणे : पुणे शहरात गेल्या काही महिन्यांपासून सायबर गुन्ह्यांचे प्रमाण वाढताना दिसत आहे. मोबाईल आणि सोशल मीडियाचा वापर वाढल्याने सुरक्षित मानल्या जाणाऱ्या माध्यमांचाही गैरवापर होत असल्याचे प्रकार समोर येत आहेत. अशाच एका धक्कादायक घटनेत पुण्यातील येवलेवाडी परिसरात एका विवाहित महिलेला व्हॉट्सअॅप कॉलद्वारे त्रास देणाऱ्या तरुणाविरोधात पोलिसांनी गुन्हा दाखल केला आहे.
मिळालेल्या माहितीनुसार, येवलेवाडी येथे राहणाऱ्या 33 वर्षीय विवाहित महिलेला एका तरुणाकडून वारंवार व्हॉट्सअॅप कॉल येत होते. आरोपी कॉल करून महिलेला त्रास देत होता. मला तुझ्याशी लग्न करायचे आहे, तू तुझ्या पतीला आणि मुलांना सोडून माझ्याकडे ये, अशी मागणी करत तो तिच्यावर दबाव टाकत होता. या सततच्या त्रासामुळे महिलेला मानसिक तणावाला सामोरे जावे लागले.
हा प्रकार 28 जानेवारी रोजी घडल्याचे तक्रारीत नमूद करण्यात आले आहे. आरोपीने वारंवार फोन करून महिलेच्या खासगी आयुष्यात हस्तक्षेप करण्याचा प्रयत्न केला. अवाजवी बोलणे, सतत कॉल करणे आणि चुकीच्या मागण्या केल्यामुळे महिलेला भीती वाटू लागली होती. अखेर कंटाळून आणि मानसिक त्रास सहन न झाल्याने पीडित महिलेने येवलेवाडी पोलीस ठाण्यात तक्रार दाखल केली.
महिलेच्या तक्रारीवरून सोन रूपचंदानी नावाच्या तरुणाविरोधात विनयभंगाचा गुन्हा दाखल करण्यात आला आहे. पोलिसांनी दिलेल्या माहितीनुसार, आरोपीने व्हॉट्सअॅप कॉलचा वापर करून महिलेला त्रास दिला असून तिच्या कुटुंबापासून वेगळे करण्याचा प्रयत्न केला आहे.
या घटनेची पोलिसांनी गांभीर्याने दखल घेतली असून पुढील कायदेशीर प्रक्रिया सुरू करण्यात आली आहे. सध्या प्रकरणाचा तपास सुरू असून आरोपीने यापूर्वी इतर कोणाला अशाच प्रकारे त्रास दिला आहे का, याचीही चौकशी केली जात आहे. महिलांच्या सुरक्षिततेच्या दृष्टीने सोशल मीडिया आणि कॉलिंग ॲप्सचा गैरवापर करणाऱ्यांवर कडक कारवाई करण्याची गरज असल्याचे या घटनेतून स्पष्ट झाले आहे.
