Pune Crime : फुरसुंगी, ता. 17 : फुरसुंगी पोलीस ठाण्याच्या हद्दीत रात्रगस्त करत असलेल्या तपास पथकाने बुलेट मोटारसायकल चोरणाऱ्या एका चोरट्याला ताब्यात घेतले. बुधवारी (ता. 11) रात्री 2 वाजण्याच्या सुमारास ही कारवाई करण्यात आली.
प्रकाश बाबुराव भालेराव (वय 31, धंदा ड्रायव्हर, रा. लवळे फाटा, पिरंगुट, ता. मुळशी, जि. पुणे) असे अटक करण्यात आलेल्या आरोपीचे नाव आहे. त्याच्याकडून सुमारे दीड लाख रुपये किमतीची बुलेट मोटारसायकल जप्त करण्यात आली आहे.
पोलिसांनी दिलेल्या माहितीनुसार, बुधवारी रात्री तपास पथकाचे प्रभारी पोलीस उपनिरीक्षक विनोद पवार यांच्यासह पोलीस अंमलदार फुरसुंगी पोलीस ठाण्याच्या हद्दीत रात्रगस्त करत होते. रात्री 2 वाजण्याच्या सुमारास एक इसम बुलेट मोटारसायकल ढकलत घेऊन जात असल्याचे पथकाच्या निदर्शनास आले. मोटारसायकलला नंबर प्लेट नसल्याने तसेच त्या इसमाच्या हालचाली संशयास्पद वाटल्याने त्याला थांबवून चौकशी करण्यात आली. मात्र त्याने उडवा-उडवीची उत्तरे देत माहिती देण्यास टाळाटाळ केली.
संशय बळावल्याने पोलिसांनी त्या इसमाला आणि मोटारसायकलला फुरसुंगी पोलीस ठाण्यात आणले. चेसिस नंबर तपासल्यानंतर मोटारसायकलचा क्रमांक एमएच 14 एफके 4870 असून तिचा मालक आकाश सोनके असल्याचे निष्पन्न झाले.
तपासात आरोपी प्रकाश भालेराव हा काही दिवसांपासून शिंदे वासुली येथील एस.पी.आर.एम.सी. स्टोन क्रेशर कंपनीत ड्रायव्हर म्हणून काम करत असल्याचे समोर आले. त्याने आकाश सोनके यांची बुलेट मोटारसायकल चोरी केल्याची कबुली दिली. म्हाळुंगे एमआयडीसी पोलीस ठाण्याशी संपर्क साधल्यानंतर या चोरीप्रकरणी गुन्हा दाखल असल्याचे स्पष्ट झाले. त्यानंतर आरोपीला ताब्यात घेऊन मोटारसायकलसह पुढील कारवाईसाठी फुरसुंगी पोलीस ठाण्यात नोंद करण्यात आली.
ही कामगिरी वरिष्ठांच्या मार्गदर्शनाखाली फुरसुंगी पोलीस ठाण्याचे वरिष्ठ पोलीस निरीक्षक अमोल मोरे, पोलीस निरीक्षक (गुन्हे) राजेश खांडे यांच्या सूचनेनुसार पोलीस उपनिरीक्षक विनोद पवार, पोलीस हवालदार नितीन गायकवाड, सागर वणवे, हरिदास कदम, पोलीस अंमलदार हेमंत कामथे आणि अभिजित टिळेकर यांनी केली.
