Pune Crime : लोणी काळभोर, ता. 28 : लोणी काळभोर पोलीस आणि अन्न व औषध प्रशासन यांच्या संयुक्त पथकाने लोणी काळभोर (ता. हवेली) येथील पवार पान शॉपवर शुक्रवारी (ता. 27) दुपारी दोन वाजण्याच्या सुमारास धाड टाकली. या छाप्यात दोन जणांना अटक करण्यात आली असून तब्बल 47 हजार रुपयांचा प्रतिबंधित गुटखा, पानमसाला व तंबाखूजन्य पदार्थांचा साठा जप्त करण्यात आला आहे.
गणेश बाळू मंडलकर (वय 30) व निलेश वसंत पवार (वय 46, दोन्ही रा. लोणी काळभोर, ता. हवेली) अशी अटक करण्यात आलेल्या आरोपींची नावे आहेत. याप्रकरणी अन्न सुरक्षा अधिकारी अस्मिता गणपत गायकवाड यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, अन्न सुरक्षा आयुक्तांच्या 16 जुलै 2025 रोजीच्या अधिसूचनेनुसार राज्यात गुटखा, पानमसाला, सुगंधित तंबाखू व फ्लेव्हर्ड सुपारी यांच्या उत्पादन, साठवण, विक्री व वाहतुकीस एक वर्षासाठी बंदी घालण्यात आली आहे. या आदेशाचे उल्लंघन करून ‘मे. पवार पान शॉप’ येथे बेकायदेशीर प्रतिबंधित अन्नपदार्थांचा साठा असल्याची खात्रीशीर माहिती मिळाली होती. मिळालेल्या माहितीच्या आधारे संयुक्त पथकाने छापा टाकला. तपासणीदरम्यान शासनाने बंदी घातलेले विविध ब्रँडचे गुटखा, पानमसाला, जर्दा, फ्लेव्हर्ड तंबाखू व सुपारी असा एकूण 47 हजार 297 रुपयांचा साठा आढळून आला.
याप्रकरणी गणेश बाळू मंडलकर व निलेश वसंत पवार यांच्याविरुद्ध भारतीय न्याय संहिता 2023 मधील कलम 123, 223, 274, 275 तसेच अन्न सुरक्षा व मानके कायदा 2006 अंतर्गत विविध कलमांन्वये गुन्हा दाखल करून अटक करण्यात आली आहे. छाप्यात जप्त केलेला मुद्देमाल ताब्यात घेऊन अन्न व औषध प्रशासनाच्या मोशी येथील गोदामात सुरक्षित ठेवण्यात आला आहे. तसेच संबंधित दुकान पुढील आदेशापर्यंत सील करण्यात आले आहे.
ही कारवाई पोलीस उपायुक्त डॉ. राजकुमार शिंदे व सहाय्यक पोलीस आयुक्त अनुराधा उदमले यांच्या मार्गदर्शनाखाली लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे, पोलीस हवालदार रामहरी वणवे, पोलीस अंमलदार योगेश पाटील तसेच अन्न सुरक्षा अधिकारी अस्मिता गायकवाड, बी. आर. शिंदे व सुप्रिया जगताप यांनी संयुक्तरीत्या केली.
