Pune News: पुणे: पुणे जिल्ह्यातील चाकण परिसरात एक भीषण घटना घडली. चाकण येथील आंबेठाण रस्त्यावर एक पिसाळलेला कुत्रा अचानक नागरिकांवर हल्ले करत सुटल्याने संपूर्ण परिसरात घबराटीचे वातावरण निर्माण झाले. हा कुत्रा जो दिसेल त्याच्यावर झडप घालत होता. लहान मुले, महिला, वृद्ध नागरिक इतकेच नाही तर रस्त्यावरील इतर प्राण्यांनाही त्याने चावा घ्यायला सुरुवात केली होती. काही क्षणांतच परिस्थिती हाताबाहेर गेली आणि लोकांमध्ये भीती पसरली.
भाजी आणायला गेलेली महिला, रस्त्याने चालणारे वृद्ध, तसेच लहान मुले या कुत्र्याच्या हल्ल्याचे बळी ठरले. लोक स्वतःचा जीव वाचवण्यासाठी सैरावैरा पळू लागले. घराबाहेर पडणेही कठीण झाले होते. हा पिसाळलेला कुत्रा पुढे महात्मा फुले चौक, श्री शिवाजी विद्यामंदिर आणि मार्केट यार्ड परिसरात पोहोचला. त्याने इतर भटक्या कुत्र्यांनाही चावा घेतला, त्यामुळे संकट आणखी वाढले.
पालिकेकडून वेळेत उपाययोजना न झाल्याने संतप्त नागरिकांनी अखेर स्वतःचा जीव धोक्यात घालून त्या कुत्र्याला ठार मारले. मात्र संकट तिथेच थांबले नाही. ज्या कुत्र्यांना या पिसाळलेल्या कुत्र्याने चावा घेतला होता, ते कुत्रेही हल्ले करत सुटले. या हल्ल्यांमध्ये चाकण परिसरातील सुमारे 40 नागरिक जखमी झाले, तर इतर पिसाळलेल्या कुत्र्यांच्या हल्ल्यात 5 जणांना चावा बसला.
जखमी नागरिक उपचारासाठी चाकण ग्रामीण रुग्णालयात दाखल झाले. मात्र तेथे रेबीजची लस उपलब्ध नसल्याचे समोर आले. रक्ताने माखलेले कपडे, वेदनेने विव्हळणारी लहान मुले आणि घाबरलेले वृद्ध यांना घेऊन नातेवाइकांना पुण्यातील ससून रुग्णालय किंवा पिंपरी चिंचवडमधील यशवंतराव चव्हाण रुग्णालयात धाव घ्यावी लागली. सायंकाळी उशिरा चाकण ग्रामीण रुग्णालयात लस उपलब्ध झाली, मात्र तोपर्यंत नागरिकांचा संताप अनावर झाला होता. प्रशासनाच्या दुर्लक्षामुळे सामान्य नागरिकांना भीतीच्या वातावरणात जगावे लागत असल्याची भावना यावेळी व्यक्त करण्यात आली.
