अमित मुंडीक
पुणे: हडपसर परिसरातील मोटारसायकल चोरीच्या मालिकेचा उलगडा करण्यात गुन्हे शाखेच्या युनिट-6 पथकाला यश आले आहे. या कारवाईत एका विधीसंघर्षित बालकासह दोन तरुणांना ताब्यात घेण्यात आले असून एकूण सहा गुन्हे उघडकीस आले आहेत.
29 जानेवारी 2026 रोजी हडपसर पोलीस ठाणे येथे मोटारसायकल चोरीचा गुन्हा नोंदवण्यात आला होता. त्यानंतर तपास सुरू असताना बापुराव तुकाराम तुपे चौक, अमनोरा पार्क सोसायटीमागे दोन संशयित व्यक्ती चोरीच्या दुचाकीसह थांबले असल्याची गोपनीय माहिती पोलिसांना मिळाली.
त्यानुसार गुन्हे शाखेच्या पथकाने सापळा रचून एक विधीसंघर्षित बालक तसेच पवन तानाजी माने (वय 22, रा. लोहगाव, पुणे) आणि प्रतीक शिवाजी अस्वरे (वय 20, रा. माढा, जि. सोलापूर) यांना ताब्यात घेतले. चौकशीत आरोपींनी हडपसर, दिघी आणि चंदननगर परिसरातून विविध ठिकाणांहून मोटारसायकली चोरल्याची कबुली दिली.
अधिक तपासात विविध पोलीस ठाण्यांमध्ये दाखल असलेले एकूण सहा गुन्हे उघडकीस आले. आरोपींकडून दोन अतिरिक्त मोटारसायकलींसह सुमारे सात लाख रुपयांचा मुद्देमाल जप्त करण्यात आला आहे.
ही कारवाई अप्पर पोलीस आयुक्त पंकज देशमुख, पोलीस उपायुक्त (गुन्हे) निखील पिंगळे आणि सहायक पोलीस आयुक्त राजेंद्र मुळीक यांच्या मार्गदर्शनाखाली वरिष्ठ पोलीस निरीक्षक सुदर्शन गायकवाड आणि त्यांच्या पथकाने केली. पुढील तपास सुरू आहे.
