पुणे : राज्यातील कुस्तीविश्वातील सर्वात मानाची समजली (Maharashtra Kesari Wrestling Tournament 2026) जाणारी 68 वी महाराष्ट्र केसरी कुस्ती स्पर्धा यंदा पुणे जिल्ह्यातील वाघोली येथे होणार आहे. 18 ते 22 मार्चदरम्यान ही भव्य स्पर्धा पार पडणार असून कुस्तीगीर परिषदेच्या पुण्यात झालेल्या बैठकीत वाघोलीच्या नावावर अधिकृत शिक्कामोर्तब करण्यात आले. बैठकीला कुस्तीगीर परिषदेचे अध्यक्ष रामदास तडस यांच्यासह पदाधिकारी उपस्थित होते.
या राज्यस्तरीय स्पर्धेत 42 शहरांमधील सुमारे 840 कुस्तीगीर विविध वजनी गटांत सहभागी होणार आहेत. माती आणि गादी या दोन्ही प्रकारांत वरिष्ठ गटातील सामने रंगणार आहेत. दरवर्षीप्रमाणे विजेत्या मल्लाला मल्ल मामासाहेब मोहोळ यांच्या स्मरणार्थ 1 किलो चांदीची मानाची गदा प्रदान करण्यात येणार आहे, तर इतर गटांतील विजेत्यांना रोख पारितोषिके देण्यात येतील.
महाराष्ट्र केसरी ही स्पर्धा केवळ क्रीडा स्पर्धा नसून राज्याच्या सांस्कृतिक परंपरेचा एक भाग मानली जाते. या स्पर्धेची सुरुवात 1961 मध्ये कुस्तीमहर्षी मामासाहेब मोहोळ यांच्या पुढाकाराने झाली. पहिली स्पर्धा छत्रपती संभाजीनगर येथे झाली होती आणि दिनकर दह्यारी हे पहिले महाराष्ट्र केसरी ठरले होते.
राज्याच्या कानाकोपऱ्यातील ग्रामीण भागातील मल्लांना मोठे व्यासपीठ मिळवून देणारी ही स्पर्धा पुण्यात होत असल्याने जिल्ह्यातील क्रीडाप्रेमींमध्ये उत्साहाचे वातावरण आहे. महाराष्ट्राच्या परंपरेचा आणि अभिमानाचा मानाचा किताब जिंकण्यासाठी यंदा वाघोलीत पुन्हा एकदा रंगणार आहे कुस्तीचा थरार.
