पुणे: पुण्यातील एका व्यापाऱ्याला लुटून तब्बल एक कोटी रुपयांची रोकड पळविल्याच्या प्रकरणाने नवे वळण घेतले आहे. या दरोड्याच्या तपासादरम्यान समोर आलेल्या माहितीनुसार, संपूर्ण कटात एका महिला पोलिस कर्मचाऱ्याचा आणि एका तोतया पत्रकाराचा कथित सहभाग असल्याचे निष्पन्न झाले आहे. या खुलाशानंतर पोलिस दलातही मोठी खळबळ उडाली असून प्रकरणाचा तपास अधिक वेगाने सुरू आहे.
मिळालेल्या माहितीनुसार, आठ दिवसांपूर्वी पुण्यातील एका व्यापाऱ्याची एक कोटी रुपयांची रोकड लुटण्यात आली होती. या घटनेनंतर आरोपी रोकड असलेले वाहन घेऊन थेट खेड शिवापूर पोलिस चौकीत पोहोचल्याची बाब तपासात समोर आली. आरोपी थेट पोलिस चौकीत गेल्याने संशय निर्माण झाला. याच ठिकाणी लुटीतील २० लाख रुपये बेकायदेशीररित्या वाटून घेण्याचा प्रयत्न झाल्याचा संशय तपास यंत्रणांनी व्यक्त केला आहे.
चौकीतील संशयास्पद हालचालींची माहिती काही स्थानिकांच्या निदर्शनास आली. तसेच चौकीलगत असलेल्या एका हॉटेलमधील सीसीटीव्ही कॅमेऱ्यात काही हालचाली कैद झाल्याची माहिती समोर आली. घटनेचे गांभीर्य लक्षात घेत राजगड पोलिस ठाण्याचे पोलिस निरीक्षक संतोष जाधव यांनी तातडीने खेड शिवापूर पोलिस चौकी गाठली. त्यांनी तेथून रोकड आणि संबंधित व्यक्तींना ताब्यात घेत पुढील तपासासाठी नर्हे पोलिसांच्या स्वाधीन केले.
यानंतर पोलिस निरीक्षक संतोष जाधव यांनी संपूर्ण घटनेचा गोपनीय अहवाल पुणे ग्रामीणचे पोलिस अधीक्षक संदीप सिंह गिल यांच्याकडे सादर केला. त्यानंतर नर्हे पोलिसांनी केलेल्या तपासात तोतया पत्रकार आशिष तिवारी, राजगड पोलिस ठाण्यातील महिला पोलिस कर्मचारी प्रमिला निकम, अजीज मेस्त्री आणि आणखी दोन जणांचा या प्रकरणाशी संबंध असल्याचे समोर आल्याचा दावा पोलिसांनी केला आहे.
या प्रकरणी आतापर्यंत एकूण दहा जणांविरुद्ध गुन्हा दाखल करण्यात आला आहे. पोलिसांनी तोतया पत्रकार आशिष तिवारी याला अटक केली असून त्याची चौकशी सुरू आहे. तर महिला पोलिस कर्मचारी प्रमिला निकम आणि अजीज मेस्त्री हे अद्याप फरार असून त्यांचा शोध घेण्यासाठी पोलिसांची विशेष पथके कार्यरत आहेत. या प्रकरणातील आर्थिक व्यवहार, आरोपींची भूमिका आणि पोलिस यंत्रणेतील इतर कोणाचा सहभाग आहे का, याचाही सखोल तपास सुरू आहे.
