पुणे: पुणे शहरात सध्या चोरीच्या घटनांमध्ये मोठी वाढ झाल्याने सर्वसामान्य नागरिकांमध्ये चिंतेचे वातावरण निर्माण झाले आहे. कोथरूडमधील एका 62 वर्षीय ज्येष्ठ महिलेच्या घरात कामाला ठेवलेल्या घरकामगार महिलेनेच हात साफ केल्याचा धक्कादायक प्रकार समोर आला आहे. या महिलेने संधी साधून टेबलवर ठेवलेल्या तब्बल २ लाख रुपये किमतीच्या ३ हिरेजडीत सोन्याच्या अंगठ्या लंपास केल्या. या प्रकरणी कोथरूड पोलीस ठाण्यात संबंधित महिलेविरुद्ध गुन्हा दाखल करण्यात आला असून, पोलीस पुढील तपास करत आहेत.
केवळ कोथरूडच नव्हे, तर शहराच्या इतर भागांतही चोरांचा धुमाकूळ सुरू आहे. दुसरीकडे, कल्याणीनगर परिसरात शनिवारी चोरीची एक वेगळीच घटना घडली. रस्त्याच्या कडेला उभ्या असलेल्या एका कारची काच फोडून अज्ञात चोरट्यांनी आतील 1 लाख 50 हजार रुपयांची रोकड लंपास केली. येरवडा पोलीस या प्रकरणाचा तपास करत असून, परिसरातील सीसीटीव्ही फुटेजच्या मदतीने चोरांचा शोध घेतला जात आहे.
या वाढत्या गुन्हेगारीमुळे पुणेकर आता सतर्क झाले आहेत. वाढत्या चोरीच्या घटनांमुळे नागरिकांनी स्वतःच्या सुरक्षिततेसाठी अधिक जागरूक राहणे आवश्यक आहे.
