पुणे : केतन अग्रवाल हत्याकांडाच्या तपासात आणखी एक धक्कादायक माहिती समोर आल्याचा दावा केला जात आहे. सूत्रांकडून मिळालेल्या माहितीनुसार, आरोपी सिया गोयल आणि तिचा कथित प्रियकर चेतन यांनी केतन अग्रवालला संपवण्यासाठी ‘स्लो पॉयझन’ देण्याचाही कट रचला होता. मात्र, त्यांना हे विष मिळवण्यात यश न आल्याने हा डाव फसल्याची माहिती समोर येत आहे.
तपासाशी संबंधित सूत्रांच्या माहितीनुसार, सिया आणि चेतन यांना एकत्र आयुष्य जगायचे होते. मात्र, सियाचा होणारा पती केतन अग्रवाल त्यांच्या मार्गातील अडसर असल्याचे त्यांना वाटत होते. त्यामुळे त्याला कायमचा दूर करण्यासाठी दोघांनी वेगवेगळ्या पर्यायांवर विचार केल्याचा संशय तपास यंत्रणांना आहे.
सूत्रांच्या माहितीनुसार, आरोपींनी केतनला रोजच्या अन्नातून किंवा पेयातून हळूहळू ‘स्लो पॉयझन’ देण्याची योजना आखली होती. त्यामुळे त्याच्या शरीरातील महत्त्वाचे अवयव निकामी होतील आणि त्याचा मृत्यू होईल, असा त्यांचा कथित हेतू होता. तसेच मृत्यू झाला नाही, तर तो कायमचा अपंग व्हावा, अशीही त्यांची तयारी होती, असा दावाही तपासातील माहितीतून समोर आला आहे.
यासाठी ‘स्लो पॉयझन’ मिळवण्याचे अनेक प्रयत्न करण्यात आल्याचेही सांगितले जात आहे. विविध माध्यमांतून आणि वेगवेगळ्या ठिकाणी याचा शोध घेण्यात आला. मात्र, संबंधित विष मिळू न शकल्याने ही योजना प्रत्यक्षात आली नाही आणि त्यांचा हा कथित डाव अयशस्वी ठरल्याची माहिती सूत्रांनी दिली आहे.
दरम्यान, या प्रकरणाचा पोलीसांकडून सखोल तपास सुरू असून प्रत्येक बाबीची पडताळणी केली जात आहे. ‘स्लो पॉयझन’चा कट रचल्याचा दावा अद्याप अधिकृतपणे पोलिसांकडून जाहीर करण्यात आलेला नाही. तपास पूर्ण झाल्यानंतरच याबाबतचे नेमके सत्य स्पष्ट होणार आहे.
