पुणे: येरवडा परिसरातील फुलेनगर येथे आईला मारहाण करत (Pune Crime) असल्याची माहिती नियंत्रण कक्षाला मिळताच पोलीस तत्काळ घटनास्थळी दाखल झाले. मात्र समजावण्याचा प्रयत्न करत असताना संबंधित मुलानेच पोलिसांवर हल्ला केल्याची धक्कादायक घटना घडली. या प्रकरणी विश्रांतवाडी पोलिसांनी आरोपीला अटक केली आहे. (Latest Marathi News)
श्रेयश संजय कोराड (वय 30, रा. फुलेनगर, येरवडा) असे अटक करण्यात आलेल्या आरोपीचे नाव आहे. याबाबत विश्रांतवाडी पोलीस ठाण्यातील एका पोलीस अंमलदाराने फिर्याद दिली आहे. ही घटना 6 एप्रिल रोजी सायंकाळी सुमारे 7.45 वाजण्याच्या सुमारास वि. द. घाटे शाळेजवळ घडली.
पोलिसांनी दिलेल्या माहितीनुसार, नियंत्रण कक्षाकडून अंकुश काची यांना माहिती मिळाली की, एक युवक आपल्या आईला शिवीगाळ करत असून तिला जीवे मारण्याची धमकी देत आहे. तसेच तो मोठ्याने आरडा-ओरडा करत असल्यामुळे परिसरात भीतीचे वातावरण निर्माण झाले होते. ही माहिती मिळताच पोलीस तातडीने घटनास्थळी पोहोचले.
तेथे पोहोचल्यानंतर पोलिसांनी श्रेयश कोराड याला शांत करण्याचा आणि त्याला आई उज्वला कोराड (वय 55) यांना मारहाण करू नये, असे समजावण्याचा प्रयत्न केला. मात्र तो मद्याच्या नशेत असल्याने त्याने पोलिसांचे ऐकले नाही. उलट त्याने आक्रमक होत पोलीस अंमलदारांची कॉलर पकडली आणि त्यांना खाली पाडले.
यानंतर आरोपीने पोलिसांना धक्काबुक्की करत शिवीगाळ केली आणि जीवे मारण्याची धमकी दिली. या झटापटीत त्याने पोलिसांच्या गणवेशाची बटणे देखील तोडली. परिस्थिती नियंत्रणाबाहेर जात असल्याचे लक्षात येताच मदतीसाठी इतर पोलिसांना बोलावण्यात आले.
मदतीला आलेल्या पोलीस अंमलदार धुगे यांनाही आरोपीने शिवीगाळ करत दमदाटी केली. तसेच तपास पथकातील पोलिस घटनास्थळी आल्यानंतर त्यांनाही त्याने धमक्या दिल्या. त्यामुळे परिसरात काही काळ तणावाचे वातावरण निर्माण झाले होते.
या संपूर्ण प्रकारानंतर पोलिसांनी तत्काळ कारवाई करत श्रेयश कोराड याच्यावर सरकारी कामात अडथळा आणणे, पोलिसांवर हल्ला करणे आणि धमकी देणे या गुन्ह्यांखाली गुन्हा दाखल केला. त्यानंतर त्याला अटक करण्यात आली.
या घटनेमुळे परिसरात काही काळ खळबळ उडाली होती. कौटुंबिक वादातून सुरू झालेल्या या प्रकाराने गंभीर वळण घेतल्याचे समोर आले आहे. पुढील तपास विश्रांतवाडी पोलीस करत आहेत.
