पुणे: पुण्यातील बिबवेवाडी परिसरात कौटुंबिक वादातून घडलेल्या (Pune Crime) धक्कादायक घटनेत गंभीर जखमी झालेल्या विवाहितेचा उपचारादरम्यान मृत्यू झाला आहे. या प्रकरणी पोलिसांनी पतीला अटक करत खुनाचा गुन्हा नोंदवला आहे. (Latest Marathi News)
सारीका शुभम घोडके (वय 23) असे मृत्यू पावलेल्या महिलेचे नाव असून, तिचा पती शुभम श्रीकांत घोडके (वय 29) याला पोलिसांनी ताब्यात घेतले आहे. सारीकाच्या आईने दिलेल्या फिर्यादीवरून हा गुन्हा नोंदवण्यात आला आहे.
पोलिसांच्या माहितीनुसार, शुभम घोडके हा पानटपरी चालवतो, तर सारीका गृहिणी होती. त्यांना एक मुलगा आणि एक मुलगी आहे. मात्र, शुभम हा पत्नीच्या चारित्र्यावर वारंवार संशय घेत असे आणि त्यातून दोघांमध्ये सतत वाद होत होते. 24 मार्च रोजी दुपारी तो घरी आल्यानंतर याच कारणावरून पुन्हा वाद झाला. या वादाचे रूपांतर हिंसाचारात झाले आणि त्याने तीक्ष्ण हत्याराने पत्नीवर डोक्यावर, हातावर आणि पायावर वार केले.
या हल्ल्यात सारीका गंभीर जखमी झाली. तिला तातडीने रुग्णालयात दाखल करण्यात आले होते. सुरुवातीला पोलिसांनी खुनाच्या प्रयत्नाचा गुन्हा दाखल करून आरोपीला अटक केली होती. मात्र, उपचार सुरू असताना गुरुवारी पहाटे तिचा मृत्यू झाला.
या घटनेनंतर पोलिसांनी गुन्ह्यात खुनाचे कलम वाढवले असून पुढील तपास सुरू आहे.
