पुणे: पुण्यातून माणुसकीला काळिमा फासणारी घटना समोर आली आहे. पायावरून दुचाकी गेल्याचा जाब विचारल्याच्या रागातून एका तरुणाला दुचाकीवरील भाऊ-बहिणीने मारहाण केली. पतीला वाचवण्यासाठी धावून आलेल्या गरोदर महिलेवरही आरोपींनी हल्ला केला. यावेळी आरोपीने महिलेच्या पोटात लाथ मारल्याने ती गंभीर जखमी झाली. या घटनेनंतर महिलेचा गर्भपात झाला आणि तिच्या पोटातील बाळाचा मृत्यू झाल्याचे तक्रारीत नमूद करण्यात आले आहे. या प्रकरणी समर्थ पोलिस ठाण्यात भाऊ-बहिणीविरोधात गुन्हा दाखल करण्यात आला आहे.
गुरुवारी रात्री सुमारे नऊ वाजण्याच्या सुमारास तक्रारदार तरुण आपल्या घरासमोर उभा होता. त्यावेळी आरोपी सज्जाद बबलू मेमन हा भरधाव वेगाने दुचाकीवरून तेथून जात होता. त्याच्या दुचाकीचे चाक तक्रारदाराच्या पायावरून गेले. त्यामुळे तरुणाने सज्जादला थांबवून जाब विचारला. दुचाकीला हॉर्न नाही का, असा प्रश्न त्याने विचारला. याचा राग आल्याने सज्जादने तरुणाला मारहाण करण्यास सुरुवात केली.
पतीला मारहाण होत असल्याचे पाहून त्याची गरोदर पत्नी मदतीसाठी धावत आली. तिने आरडाओरडा करत आसपासच्या नागरिकांकडे मदत मागितली. परिसरातील काही नागरिकांनी घटनास्थळी येत भांडण सोडवण्याचा प्रयत्न केला. मात्र, आरोपी सज्जादची बहीण सना हिनेही गरोदर महिलेवर हल्ला केला. सनाने महिलेचे केस पकडून तिला मारहाण केली. त्यानंतर सज्जादने महिलेच्या पोटात जोरात लाथ मारल्याचा आरोप आहे.
हल्ल्यात महिला जमिनीवर कोसळली. त्यानंतर तिला तीव्र पोटदुखीचा त्रास सुरू झाला तसेच रक्तस्त्रावही झाला. घटनेची माहिती मिळाल्यानंतर पोलिसांनी तातडीने घटनास्थळी धाव घेतली आणि महिलेला उपचारासाठी ससून रुग्णालयात दाखल केले. मात्र, वैद्यकीय तपासणीत महिलेचा गर्भपात झाल्याचे आणि तिच्या पोटातील बाळाचा मृत्यू झाल्याचे समोर आले. यानंतर महिलेच्या पतीने पोलिसांत तक्रार दाखल केली. त्यानुसार सज्जाद बबलू मेमन आणि सना यांच्याविरोधात समर्थ पोलिस ठाण्यात गुन्हा दाखल करण्यात आला आहे. गंभीर दुखापत करणे आणि महिलेच्या संमतीशिवाय गर्भपात घडवून आणणे यांसह संबंधित कलमांनुसार कारवाई करण्यात आली असून, उपनिरीक्षक तानाजी शेगर या प्रकरणाचा पुढील तपास करत आहेत.
