पुणे: प्रेमात पडल्यावर अनेकदा व्यक्ती कोणताही विचार न करता आपल्या आवडत्या व्यक्तीसोबत आयुष्य घालवण्याचा निर्णय घेते. पुण्यातील हवेली तालुक्यात अशीच एक घटना समोर आली आहे. बीएससी कॉम्प्युटर सायन्सच्या अंतिम वर्षात शिकणारी २२ वर्षीय तरुणी नेहमीप्रमाणे गुरुवारी सकाळी कॉलेजला गेली. मात्र, संध्याकाळ झाली तरी ती घरी परतली नाही. बराच वेळ उलटून गेल्यानंतर कुटुंबीयांनी तिचा शोध सुरू केला. मित्र-मैत्रिणी, नातेवाईक तसेच आसपासच्या परिसरात चौकशी करूनही तिच्याबाबत कोणतीही माहिती मिळाली नाही.
दरम्यान, कुटुंबीय तिचा शोध घेत असतानाच तरुणीने स्वतःहून घरच्यांना ई-मेल पाठवला. या ई-मेलमधील मजकूर वाचल्यानंतर कुटुंबीयांना मोठा धक्का बसला. आपण एका तरुणासोबत घरातून निघून जात असल्याचे तिने ई-मेलमध्ये सांगितले. संबंधित तरुणाला एड्स असल्याची माहिती असूनही त्याच्यासोबतच लग्न करण्याचा निर्णय घेतल्याचेही तिने नमूद केले. आई, भाऊ आणि लहान बहिणीला हा ई-मेल मिळाल्यानंतर कुटुंबीय चिंतेत पडले.
तरुणी नेमकी कुठे आहे, ती कोणत्या तरुणासोबत गेली आहे आणि ती सुरक्षित आहे का, याबाबत कुटुंबीयांना कोणतीही माहिती मिळाली नाही. त्यामुळे तिच्या वडिलांनी फुरसुंगी पोलीस ठाण्यात धाव घेत तक्रार दाखल केली. पोलिसांनी या प्रकरणी अपहरणाचा गुन्हा दाखल केला असून तरुणीचा शोध सुरू केला आहे. तिच्यासोबत असलेल्या तरुणाचाही पोलीस शोध घेत आहेत. तरुणीने ई-मेलमध्ये स्वतःच्या इच्छेने संबंधित तरुणासोबत जाण्याचा निर्णय घेतल्याचे म्हटले असले तरी, ती सध्या नेमकी कुठे आहे आणि तिची स्थिती काय आहे, याची खात्री करण्यासाठी पोलिसांकडून तपास केला जात आहे. या घटनेमुळे परिसरातही चर्चा सुरू झाली असून, तरुणी आणि संबंधित तरुणाचा शोध लागल्यानंतरच या प्रकरणातील पुढील बाबी स्पष्ट होणार आहेत.
