पुणे: मुंबई-पुणे द्रुतगती मार्गावरील मिसिंग लिंक प्रकल्पातील बोगदा क्रमांक 2 मध्ये कारवर दगड कोसळल्याची घटना सोमवारी सायंकाळी घडली. या घटनेत कारची पुढील काच फुटली. मात्र सुदैवाने कोणतीही जीवितहानी झाली नाही.
खंडाळा महामार्ग पोलिसांनी दिलेल्या माहितीनुसार, मुंबईहून पुण्याकडे जाणारी कार बोगदा क्रमांक 2 मधून जात असताना अचानक दोन ते तीन दगड कारच्या पुढील काचेवर पडले. या धडकेमुळे कारची काच फुटली आणि काचेचे तुकडे चालकाच्या अंगावर उडाले.
या घटनेत कारचालक उचप्पा खतनाप्पा वरचल्ली (वय 53, रा. खोपोली, जि. रायगड) हे किरकोळ बचावले. त्यांनी या प्रकरणी कोणतीही पोलिस तक्रार दाखल केली नसल्याची माहिती पोलिसांनी दिली.
घटनेची माहिती मिळताच खंडाळा महामार्गाचे सहायक पोलीस निरीक्षक सुनील अवसरमोल, पोलीस उपनिरीक्षक समीर कटपाळे आणि महाराष्ट्र सुरक्षा रक्षकांचे कर्मचारी घटनास्थळी दाखल झाले. त्यांनी घटनास्थळाची पाहणी करून परिस्थितीचा आढावा घेतला.
दरम्यान, मुंबई-पुणे मिसिंग लिंक मार्गाचे उद्घाटन 1 मे 2026 रोजी करण्यात आले होते. या मार्गामुळे मुंबई-पुणे प्रवासाचा वेळ 25 ते 30 मिनिटांनी कमी झाला असून वाहतूक कोंडीच्या काळात सुमारे एक तासाची बचत होत आहे. या प्रकल्पात जगातील सर्वात रुंद भुयारी बोगदा आणि टायगर व्हॅलीवरील केबल-स्टेड पूल उभारण्यात आला आहे.
या मार्गावर वाहनचालकांनी नियमांचे पालन करावे, पुलावर किंवा बोगद्याजवळ वाहन थांबवू नये तसेच सेल्फी किंवा व्हिडिओ काढण्यासाठी वाहनातून उतरू नये, असे आवाहन प्रशासनाने केले आहे.
