पुणे : पुणे आंतरराष्ट्रीय विमानतळावर कस्टम्स आणि महसूल गुप्तवार्ता संचालनालयाच्या (DRI) पथकाने अमली पदार्थांची तस्करी उघडकीस आणली आहे. बँकॉकहून पुण्यात आलेल्या एका भारतीय महिलेच्या सामानाची तपासणी करताना कॉस्मेटिकच्या तीन डब्यांमध्ये लपवून आणलेले सुमारे १ कोटी रुपये किमतीचे हशिश जप्त करण्यात आले. या प्रकरणी संबंधित महिलेला अटक करण्यात आली असून पुढील तपास सुरू आहे.
मिळालेल्या माहितीनुसार, १ ऑक्टोबर रोजी सायंकाळी एअर इंडिया एक्स्प्रेसच्या (IX-241) विमानाने ही महिला बँकॉकहून पुणे विमानतळावर आली होती. विमानतळावर तिच्या हालचाली संशयास्पद वाटल्यानंतर एअर इंटेलिजन्स युनिट (AIU) आणि DRIच्या अधिकाऱ्यांनी तिच्यावर लक्ष ठेवले. त्यानंतर कायदेशीर प्रक्रिया पूर्ण करून तिच्या चेक-इन सामानाची तपासणी करण्यात आली.
सामानाच्या तपासणीदरम्यान अधिकाऱ्यांना कॉस्मेटिकचे तीन डबे आढळून आले. यापैकी दोन डबे ‘राइस अँड योक हेअर ट्रीटमेंट’चे, तर एक डबा ‘बॉडी स्क्रब’चा होता. डबे बाहेरून सामान्य दिसत असले तरी त्यांच्यावर संशय आल्याने अधिकाऱ्यांनी त्यांची तपासणी केली. डबे उघडल्यानंतर त्यामध्ये मेणासारखा पदार्थ आढळून आला. तसेच त्यातून विशिष्ट वास येत असल्याने अधिकाऱ्यांचा संशय बळावला.
यानंतर नार्कोटिक ड्रग फिल्ड टेस्टिंग किटच्या माध्यमातून या पदार्थाची प्राथमिक तपासणी करण्यात आली. त्यामध्ये हा पदार्थ कॅन्नाबिस एक्सट्रॅक्ट अर्थात हशिश असल्याचे निष्पन्न झाले. या कारवाईत एकूण सुमारे १ किलो २४३ ग्रॅम अमली पदार्थ जप्त करण्यात आला असून त्याची आंतरराष्ट्रीय बाजारातील किंमत सुमारे १ कोटी रुपये असल्याचे सांगण्यात येत आहे.
कस्टम्स आणि DRIच्या पथकाने एनडीपीएस कायदा १९८५ अंतर्गत अमली पदार्थ जप्त करून संबंधित महिलेला अटक केली आहे. हा अमली पदार्थ पुण्यात कोणाला देण्यात येणार होता, तसेच या प्रकरणामागे आणखी कोणाचा सहभाग आहे का, याचा तपास अधिकारी करत आहेत.
